AES ataýyn tańdaý: Konkýrsqa daıyndyq bastaldy

ASTANA. KAZINFORM – Atom energııasy jónindegi agenttik Almaty oblysynyń Jambyl aýdanynda salynýy josparlanǵan atom elektr stansasyna ataý berý boıynsha jalpyhalyqtyq konkýrsty uıymdastyrý jumystaryna kiristi.

Qazaqstan Respýblıkasy Prezıdentiniń usynysyna sáıkes, agenttiktiń buıryǵymen 29 tamyzǵa deıin konkýrsty ótkizý algorıtmin jáne onyń merzimderi men usynystardy qabyldaý jáne qaraý tártibin qamtıtyn erejeler jobasyn ázirleý tapsyrylǵan jumys toby quryldy.

Sondaı-aq quramyna qoǵam ókilderi, kreatıvtik ındýstrııa mamandary, atom energetıkasy, fılologııa jáne tarıh salalarynyń sarapshylary kiretin konkýrstyq komıssııa qurý júkteldi.

Aıta keteıik, 11 tamyzda Prezıdent Qasym-Jomart Toqaev Aqordada halyqaralyq pán olımpıadalary jeńimpazdarymen jáne júldegerlerimen kezdesti.  Sol kezde Memleket basshysy AES energetıka nysany ǵana emes, ǵylymı-tehnıkalyq progrestiń jarqyn sımvoly bolýǵa tıistigin aıtty.

- Ázirge onyń ataýy joq. Bul elimizdegi tuńǵysh stansa bolǵandyqtan, halyq arasynda úzdik ataý jóninde baıqaý jarııalaýǵa bolady dep sanaımyn. Osy saıysqa qatysyp, shyǵarmashylyq qarymdaryńyzdy kórsetýge shaqyramyn. Bálkim, sheshim qabyldaǵan kezde Sizderdiń de usynystaryńyzǵa súıenermiz, — dedi Prezıdent.

Osyǵan deıin Óskemende AES mamandaryn daıarlaıtyn jańa bilim berý baǵdarlamasy iske qosylatyny týraly jazdyq.