AES, ákim saılaýy jáne akademııalyq týrızm – tanymal saıasattanýshy Joldaýdyń ózekti taqyryptaryna toqtaldy
ASTANA. KAZINFORM – Saıasattanýshy Andreı Chebotarev Kazinform agenttiginiń tilshisine bergen suhbatynda Memleket basshysynyń «Ádiletti Qazaqstan: zań men tártip, ekonomıkalyq órleý, qoǵamdyq optımızm» atty Qazaqstan halqyna Joldaýyna qatysty pikirin bildirdi.
AES boıynsha referendým
Saıasattanýshynyń aıtýynsha, Joldaýdyń negizgi túıini AES qurylysy boıynsha respýblıkalyq referendým ótkizý kúnin belgileý boldy.
«Osy is-shara qarsańynda óńirlerde, áleýmettik jelilerde jáne BAQ-ta túrli pikirler aıtylǵan birqatar qoǵamdyq tyńdaý ótkizilgeni durys boldy. Endi ár adam ózine jaqyn ustanymdy tańdaı alady. Men referendýmnyń nátıjesin boljaı almaımyn, biraq talqylaý úshin naqty kún men ýaqyttyń bekitilgeni mańyzdy», - dedi Chebotarev.
Aýdan, qala ákimderin saılaý
Sondaı-aq Andreı Chebotarev byltyrǵy pılottyq ákimder saılaýynan keıin aýdandar men oblystyq mańyzy bar qalalardyń ákimderin saılaý engizilgenin de atap ótti.
«Bıyl saılaý ótkizý týraly sheshim ekonomıkalyq jaǵdaıǵa jáne sý tasqynynyń saldaryna baılanysty bolsa kerek. Bul – saıası partııalar men qoǵamdyq birlestikterge óz kandıdattaryn anyqtaýǵa jaqsy múmkindik. Qarapaıym azamattar da saılaýǵa túsip, jan-jaqty daıyndalyp úlgeredi», - dedi saıasattanýshy.
Onyń pikirinshe, ákimderdiń saılaýy partııalardyń damýyna jáne olardyń kadrlyq quramynyń jańarýyna stımýl bolady. Sonymen qatar keıbireýleri memlekettik tirkeý deńgeıine jetken jańa partııalardyń paıda bolýyna yqpal etýi múmkin.
Bilim berý týrızmi
Chebotarev ǵylymı mamandardyń shetelde taǵylymdamadan ótýin retteýdiń mańyzdylyǵyn da atap ótti.
«Shetelge kóp adam barady, biraq mundaı saparlardyń mańyzdylyǵy jaıly áńgime bólek. Prezıdent akademııalyq týrızmdi retteý qajettigin atap ótti, óıtkeni mundaı saparlar ǵylymı maqalalar nemese oqý kýrstaryn qurý sııaqty naqty nátıjeler ákeletini mańyzdy. Bul akademııalyq týrızm maqsatynda taǵylymdamadan ótýdi boldyrmaýǵa múmkindik beredi», - dedi saıasattanýshy.
