Aeroutqyr áskerleri qolbasshysynyń orynbasaryna qatysty qylmystyq is sotqa joldandy
ASTANA. Maýsymnyń 24-i. QazAqparat /Aıdar Ospanalıev/ - Qoǵamda úlken terbelis týdyrǵan jáne arnaıy prokýrordyń óndirisinde bolǵan QR Qarýly Kúshteri Aeroutqyr áskerleri qolbasshysynyń orynbasary A.V.Balabanovqa qatysty qylmystyq is maýsymnyń 18-inde sotqa joldandy.
Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti.
Onyń sózine qaraǵanda, bul is bılikti asyra paıdalaný jáne desantshylardy daıyndaýǵa arnalǵan trenajerlardy, sondaı-aq parashıýtterdi jańartý jónindegi jumystardy satyp alý kezinde memleket qarjysyn urlaý faktisi boıynsha qozǵalǵan bolatyn. «Balabanovpen birge alaıaqtyq, zańsyz kásipkerlik jáne urlanǵan qarajatty zańdastyrǵany úshin úsh taýar tasymaldaýshy kompanııanyń menedjerleri men basshylary da sotqa berildi. Atalmysh fakti boıynsha sońǵy sózdi sot aıtady», dedi resmı ókil.
