Aeroutqyr áskeriniń serjanty qaza tapty

ASTANA. QazAqparat - Qapshaǵaı qalasynyń Aeroutqyr áskerlerine qarasty 32363 áskerı bóliminiń kishi serjanty Ashat Qazaqpaev postta basynan jaraqat alǵan kúıinde tabyldy, dep habarlaıdy QR Qorǵanys mınıstrliginiń baspasóz qyzmeti.

«31 qańtar kúni Qapshaǵaı qalasynyń Aeroutqyr áskerlerine qarasty 32363 áskerı bóliminde kelisimshart boıynsha saqshy qyzmetin atqaryp júrgen 1992 jyly týylǵan kishi serjant A.Qazaqpaev postta basynan jaraqat alǵan kúıinde tabyldy», delingen habarlamada.

Qaıtys bolýynyń sebebin anyqtaý barysynda qaza bolǵan saqshyny aýystyrýǵa kelgen kelisimshart boıynsha kishi serjant Konstantın Kamınskııdiń taýyp alǵan.

Aldyn ala málimet boıynsha, A.Qazaqpaevtyń telefon arqyly 2 habarlama jibergeni anyqtaldy. Onyń biri - týys qaryndasynyń kúıeýine jiberilgen. Habarlama mátini mynadaı: «Týystarym, barlyǵy úshin meni keshirińizder, eshkimdi kinálaýdyń qajeti joq, men josparlap, osylaı sheshýge bel býdym. Meni keshirińizder. Anama bas-kóz bolyńyzdar. Men barlyqtaryńdy qatty jaqsy kóremin». Ekinshi habarlamany Ismaılova Gúlsara esimdi qyzyna jibergen, ondaǵy habarlama mátininde bylaı delingen: «Ótinemin keshir meni, men osylaı bolǵanyn qaladym».

«Polıtsııa qyzmetkerlerine málim bolǵandaı, qyzdyń aıtýy boıynsha kishi serjant Qazaqpaev qarjylyq problemalary bar anasynyń nesıesin tólep kelgen. Odan basqa, qaıtys bolǵan jigittiń týys inisiniń bergen aqparaty boıynsha ol demalys kezinde eki ret asylý jáne kúre tamyryn kesý arqyly ózine-ózi qol jumsamaq bolǵan. Bunyń bárine anasy ekeýiniń arasyndaǵy urys-keris sebep bolýy múmkin», delingen habarlamada.

Áskerı bólimde qaıtys bolǵan áskerı qyzmetshige jaqsy minezdeme berip otyr. Qarýlastarynyń aıtýynsha, kishi serjant Qazaqpaev komandırlermen jáne jeke qurammen urys-keriske barmaǵan.

Qazirgi ýaqytta osy is boıynsha tergeý júrgizilýde.