Aerotaksıdi iske qosý: qaı elderdiń tájirıbesi qaraldy
ASTANA. KAZINFORM – Aerotaksı qyzmetin engizý úshin áýe keńistigin basqarý júıesin jańartý qajet pe? Bul suraqqa Kólik mınıstrligi jaýap berdi.
- «Alatau Advance Air Group Ltd.» jeke kompanııasy (AAAG) qalalyq áýe mobıldigi (Urban Air Mobility), sonyń ishinde aerotaksı jáne pılotsyz avıatsııalyq jelini (PAJ) qamtıtyn júıelerdi basqarý deńgeıindegi naryqty jan-jaqty zerttep jatyr, - delingen mınıstrliktiń Kazinform agenttigine bergen jaýabynda.
Sonymen qatar Qazaqstan qaı modeldi tańdaǵany málim boldy.
- AAAG málimetteri boıynsha, AQSh, Ulybrıtanııa, Brazılııa jáne Qytaıdan elektrlik tik kóteriletin jáne qonatyn (electric Vertical Take-Off and Landing (eVTOL) aircraft) ushaqtardy óndiretin jetekshi óndirýshilerdiń qatysýymen halyqaralyq tender ótkizildi. Nátıjesinde, jobany iske qosý úshin eki jetekshi álemdik óndirýshi tańdaldy – AutoFlight (Qytaı) jáne Joby Aviation (AQSh), - dep atalyp ótken vedomstvo aqparatynda.
Aıta keteıik, aerotaksı qyzmeti bastapqy kezeńde Alataý jáne Almaty qalalarynda iske qosylady.
