«Aeroflot» áýe kompanııasynyń reısteri Qazaqstanǵa ushyryla bastady
ASTANA. QazAqparat - 27 qazanda reseılik «Aeroflot» áýe kompanııasynyń alǵashqy reısteri Máskeýden Astanaǵa, Almatyǵa jáne keri baǵytta jolaýshylardy tasymaldady, dep habarlaıdy aeroport.kz.
Sondaı-aq áýe kompanııasy Qazaqstan qalalaryna ushyrylatyn reısterge bıletterin sata bastady.
26 qazanda Reseıdiń áýe kóliginiń federaldyq agenttigi «Transaero» áýe kompanııasynan qyzmet kórsetý sertıfıkatyn jaramsyz dep tanydy. Bul tasymaldaýshynyń 156 reısiniń 56-sy, sonyń ishinde Qazaqstannyń 11 qalasyna ushatyn reısteri «Aeroflotqa» tapsyryldy. 27 qazanda «Aeroflot» alǵash ret Astanaǵa kommertsııalyq reısti júzege asyrdy. Ushaq Qazaqstan astanasyna tańǵy saǵat 6.10-da ushyp kelip, saǵat 7.25-te qaıta Máskeýge ushty. Al Almatyǵa tańǵy saǵat 4.44-te ushyp kelip, saǵat 6.30-da keri baǵyttaldy. «Aeroflot» áýe kompanııasy «Transaeronyń» Qazaqstanǵa jasaǵan reısteriniń burynǵy kestesin saqtaýǵa tyrysty. Alaıda burynǵy tasymaldaýshy Qazaqstannan reısterdi máskeýlik Domodedov jáne Vnýkovo áýejaılaryna jetkizse, «Aeroflot», Sheremetevo áýejaıyna ushady. Reseılik áýe kompanııasy Qazaqstannyń keı qalalaryna ushyrylatyn reıster bıletterin sata bastady. Atap aıtqanda, Máskeý-Almaty jáne Máskeý-Aqtaý tikeleı reısteriniń baǵasy eki baǵytqa da 87,7 myń teńgeden, Máskeý-Aqtóbe jáne Máskeý-Atyraý - 85 myń teńgeden, Máskeý-Astana - 98 myń teńgeden, Máskeý-Qaraǵandy - 67 myń teńgeden.
