Aqberen Elgezek: Meniń óleńimdi Muqaǵalı aqyn jazǵan dep oqıtyndar kóp
ASTANA. KAZINFORM – Qazaq poezııasynda ózindik orny bar, «Daryn» memlekettik jastar syılyǵynyń ıegeri, Qazaqstan Jazýshylar odaǵynyń múshesi, aqyn Aqberen Elgezektiń shyǵarmashylyǵymen ádebıetsúıer qaýym jaqsy tanys. Osyǵan deıin bes kitaby jaryq kórdi.
«Men negizi táp-táýir aqyn edim, keıingi kezde jazýshy bolyp kettim» degen Aqberen Elgezek prozaǵa da bet burdy.
«Bolmaǵan balalyq shaq» atty povesi qazaq bestsellerine aınaldy desek, qatelespeımiz. Sebebi aqynnyń balalyq shaǵynan jadynda qalǵan estelikterin jańǵyrtqan atalmysh kitaptyń búginde otyz myńǵa jýyq danasy satylǵan.
«Jaqsy oqylǵan, oqyrman qaýym jyly qabyldaǵan kitap boldy» deıdi aqyn.
Dál osy shyǵarmanyń jelisi boıynsha Almaty qalasyndaǵy Ǵabıt Músirepov atyndaǵy teatr bastap, birneshe teatr spektakl qoıyp, qoıylym áli kúnge deıin anshlagpen ótip jatyr. Onymen qosa, Sháken Aımanov atyndaǵy «Qazaqfılm» ulttyq kınostýdııasy bıyl «Bolmaǵan balalyq shaq» atty fılm túsirýdi qolǵa aldy.
«Jazýshylyǵymnan aqyndyǵym kóbirek aıtylsa eken» deıtin Aqberen Elgezektiń:
«Seni eshkimge bermeımin, suramasyn,
Suramasyn janymnyń munarasyn», — deıtin óleń joldaryn Muqaǵalı Maqataevtiki dep oılaıtyndar da bar. Aqyn talaı ret óleńiniń avtory Muqaǵalı Maqataev dep jazylyp, aıtylyp júrgenin biletinin jáne oǵan ishteı qýanatynyn jasyrmady.
Kópshiliktiń kóńilinen shyǵyp, «hıtke» aınalǵan «Súıikti etshi», «Sezim úshin» sııaqty ánderdiń mátinin de Aqberen Elgezek jazǵan.
Shyǵarmashylyq adamynyń janyn túsinip, jazýǵa jaǵdaı jasaıtyn — jary, belgili jýrnalıst Dına Elgezek ekenin aıtqan aqyn-jazýshy Aqberen Elgezek qazir «Men dardaımyn» degen atpen jańa roman jazyp jatqanyn jáne taqyryp turǵysynan Bul roman qazaq ádebıetinde jańalyq bolatynyn aıtty.
Jańa romannyń oqyrmany kóp bolsyn degen tilek aıtamyz.
