AEHA Ózbekstan bıliginiń AES salý josparyna qoldaý bildirdi
TAShKENT. KAZINFORM – AEHA Ózbekstan bıliginiń az qýaty AES salý jobasyn qoldaıdy ári ony iske asyrý úshin kómek kórsetýge daıyn. Samarqanda ótken atom energetıkasynyń keleshegi men múmkindigi talqylanǵan halyqaralyq konferentsııada Atom energııasy jónindegi halyqaralyq agenttiktiń Bas dırektory Rafael Grossı osylaı málim etti, dep habarlaıdy Kazinform agenttiginiń menshikti tilshisi.
Aýqymdy is-sharaǵa atom energetıkasyn damytýǵa bet alǵan álem elderinen kelgen resmı ókilder, sarapshylar men Atom energııasy jónindegi halyqaralyq agenttiktiń (AEHA) delegatsııasy qatysty.
Konferentsııanyń ashylý saltanatynda Ózbekstan prezıdentiniń baspasóz hatshysy Sherzod Asadov prezıdent Shavkat Mırzıeevtiń quttyqtaý hatyn oqyp berdi.
- Senimdi, qaýipsiz, tıimdi ári ekologııalyq taza energııa kózderin paıdalaný - Jańa Ózbekstanda júrgizilip jatqan aýqymdy reformalardyń basty baǵyty sanalady. Bizdiń elimiz álemde alǵashqylardyń biri bolyp halyqaralyq talap pen standartqa saı keletin az qýatty atom elektr stantsııasyn salýdy bastady. Biz osy jobany jáne ǵylym, densaýlyq saqtaý salasyndaǵy birqatar baǵdarlamany tabysty iske asyrý úshin AEHA-ny mańyzdy seriktes sanaımyz. Atom energetıkasynyń ozyq tehnologııalaryn engizý memleketimizdiń damýyna, ınnovatsııalyq ekonomıkaǵa kóshýge aıryqsha serpin bereri sózsiz, - delingen Sh.Mırzıeevtiń konferentsııa qatysýshylaryna arnalǵan hatynda.
Odan keıin sóz alǵan Atom energııasy jónindegi halyqaralyq agenttiktiń bas dırektory Rafael Grossı atomdy beıbit maqsatta utymdy paıdalanyp, ony halyq ıgiligine tıimdi jaratý máselesine toqtaldy.
- Atom energetıkasyn jańartylǵan energııa kózderimen teńdestire otyryp damytý qajet. Tıisinshe, qazir kóptegen álem elderi osy ustanymdy basshylyqqa alady. Onyń ishinde Parsy shyǵanaǵy men Ortalyq Azııa aımaǵynda ornalasqan memleketter bar. Atomdy beıbit maqsatta qoldaný - basty maqsat bolýy tıis. Ol úshin agenttik atom energetıkasy baǵytyndaǵy jobalardy Ortalyq Azııa elderimen ózara yntymaqtastyqta júzege asyrýǵa nıetti. AEHA Ózbekstan bıliginiń az qýaty AES salý jobasyn qoldaıdy ári ony iske asyrý úshin kómek kórsetýge daıyn, - dedi Rafael Grossı.
Óz kezeginde «Uzatom» agenttiginiń dırektory Azım Ahmedhadjaev Atom energııasy jónindegi halyqaralyq agenttikpen yntymaqtastyqty damytý úshin jumys tobyn qurý josparlanǵanyn atap ótti.
- AEHA Ózbekstanda atom energetıkasyn damytýǵa járdemdesýge nıetti. Atap aıtqanda, agenttik halyqaralyq qaýipsizdik standarttarynyń qatań saqtalýyn qadaǵalap, jobalardy júzege asyrýǵa kómektesedi, - dep málim etti Azım Ahmedhadjaev.
Ol Samarqanda ótken atom energetıkasy jónindegi halyqaralyq konferentsııa turaqty pikir almasý alańyna aınalatynyna senim bildirdi.