AEHA Qazaqstanǵa atom elektr stantsııasyn salýdyń barlyq kezeńinde qoldaý kórsetpek
ASTANA. KAZINFORM — AEHA Bas konferentsııasy aıasynda QR Atom energııasy jónindegi agenttiginiń tóraǵasy A.M. Sátqalıevtiń AEHA Bas dırektory Rafael Grossımen jumys kezdesýi ótti, dep habarlaıdy QR Atom energııasy jónindegi agenttik.
Kelissózder barysynda Qazaqstandaǵy atom energetıkasyn damytý jónindegi ulttyq baǵdarlamany iske asyrýdyń negizgi máseleleri talqylandy. Ásirese atom elektr stantsııasyn salý josparyna, ınfraqurylymdy damytýǵa, sondaı-aq ıadrolyq tehnologııalardy ónerkásipte, aýyl sharýashylyǵynda jáne densaýlyq saqtaý salasynda qoldanýǵa erekshe nazar aýdaryldy.
— AEHA Bas dırektory Rafael Grossı Qazaqstannyń is-qımyldarynyń júıeliligi men dáıektiligin atap ótip, Agenttiktiń ıadrolyq baǵdarlamanyń barlyq kezeńinde — alańdy tańdaýdan jáne qurylysqa daıyndyqtan bastap, nysandardy paıdalanýǵa berýge deıin keshendi qoldaý kórsetýge daıyn ekenin rastady, — delingen agenttik taratqan aqparatta.
Bólek másele retinde ýran resýrstaryn utymdy paıdalaný, álemdik naryqqa turaqty jetkizilimderdi qamtamasyz etý jáne ulttyq múddeler men jahandyq mindettemeler arasyndaǵy teńgerimdi tabý máseleleri talqylandy. Qazaqstan tarapynan AES salý úshin halyqaralyq konsortsıým qurý, zertteý jobalaryn iske asyrý jáne joǵary baıytylǵan otyndy qaýipsiz saqtaýǵa arnalǵan nysandy iske qosý týraly habarlandy.
Taraptar 2025–2027 jyldary AEHA-nyń salalyq departamentteriniń júıeli ózara is-qımylyn, mıssııalar men is-sharalardy ótkizýdi kózdeıtin birlesken «jol kartasyn» ázirleýge kelisti. Kezdesýdiń qorytyndysynda Qazaqstan tarapynan Rafael Grossıge elge resmı saparmen kelip, dıalogty jalǵastyrý jáne ekijaqty yntymaqtastyqty tereńdetý jóninde resmı shaqyrý joldandy.
Budan buryn Atom energetıkasy jónindegi agenttik tóraǵasy Almasadam Sátqalıev jańa AES-tiń ataýyna qatysty pikir bildirdi.