AEF jahandyq jáne qarjylyq daǵdarystarǵa qarsy tetikterdi tabý úshin usynystar daıyndaýǵa baǵyttalǵan - Výk Eremıch
Búgin VI Astana ekonomıkalyq forýmy men Daǵdarysqa qarsy dúnıejúzilik konferentsııanyń plenarlyq májilisinde BUU Bas Assambleıasy 67-sessııasynyń tóraǵasy Výk Eremıch osylaı atap kórsetti.
«Qazaqstan qazirgi ýaqytta álemdik qaýymdastyqqa kirigýde. Sonymen qatar Shyǵys pen Batys arasynda kópir bolýda. Shynymen aıtsaq, ulttyq kólemdegi jetistikter álemdik deńgeıde óziniń kórinisterin berýde. Bul memleketke kóshbasshylyq, ozyqtyq tán. Sebebi Qazaqstan óziniń ıadrolyq qarýynan bas tartty. Qazirgi ýaqytta Qazaqstan qarýsyzdaný jáne qarýdan bas tartý saıasatyn júrgizýde. Qazaqstan dinaralyq únqatysýdyń aldyńǵy qatarly, ozyq memleketi de bolýda», - dedi V Eremıch.
Onyń aıtýynsha, búgin Astanada ótip jatqan Forýmnyń maqsaty shynymen de jahandyq jáne qarjylyq daǵdarystarǵa qarsy tetikterdi tabý úshin, usynystar daıyndaý úshin baǵyttalǵan.
«Sonymen qatar forým úsh sala boıynsha, atap aıtqanda, teńgerimdi ekonomıkalyq ósimdi qamtamasyz etý, qarjy júıesiniń ornyqty damýy úshin joldar izdeý, syrtqy shottar men syrtqy qaryzdardan qutylý, táýekelderdi basqarýdyń tetikterin tabý máselelerin kóteredi. Onyń taǵy bir baǵyty - «G-Global» tuǵyrnamasyn damytý. Ol aǵymdaǵy qaterlerdi qalaı sheshý qajettigin, qarjylyq retteý qandaı bolý kerek jáne memlekettik basqarýdy jańǵyrtý máselelerin, energetıka, taǵy basqa suraqtardy qamtyǵan bolatyn. «G-Global» adamzatqa osyndaı máselelerdi sheshýge múmkindik beredi. Bul bastama BUU Bas Assambleıasynyń 67-sessııasynda úlken talqylaý týdyryp, álemdik qaýymdastyq ókilderin qyzyqtyrǵan bolatyn», - dedi ol.
