AEF jahandyq máselelerdi talqylaý úshin óte tıimdi alań - Pan Gı Mýn

ASTANA. QazAqparat - Búgin Global Challenges Summit 2018 forýmynyń jalpy otyrysynda BUU-nyń burynǵy Bas hatshysy Pan Gı Mýn AQSh prezıdentiniń Parıj kelisiminen shyǵý týraly sheshimin synǵa aldy. Bul rette ol jahandyq máselelerdi talqylaý úshin Astana ekonomıkalyq forýmynyń óte tıimdi alań ekenin jáne Parıj kelisimi aıasynda birneshe ýaǵdalastyqqa qol jetkizilgenin atap ótti, dep habarlaıdy QazAqparat tilshisi.

«Burynǵy Bas hatshy retinde birqatar eldiń prezıdentteri men premer-mınıstrleriniń ózderine alǵan mindettemelerdi tıisinshe oryndamaı jatqanyn aıtýym kerek. Ásirese, AQSh prezıdentiniń tarıhı kelisimnen bas tartýy týraly málimdemesi úlken alańdaýshylyq týǵyzady. Eger AQSh bul protseske qoldaý bildirmese, basqa ne kútýge bolady? Áli de AQSh bul jahandyq kelisimge qaıta qosylady dep úmittenemin», - dedi Pan Gı Mýn Global Challenges Summit 2018 forýmynyń jalpy otyrysynda.

Onyń aıtýynsha, azamattyq jáne áleýmettik qoǵam bul baǵytta úlken qoldaý bildirip otyr.

«AQSh-tyń 200-den astam meri, myńnan astam jergilikti uıymdary «Biz sizdermen áli de birgemiz» dep málimdedi. Basshylyq ne aıtsa da, olar qorshaǵan ortaǵa qamqorlyq kórsetýde óz jumysyn jalǵastyrýǵa nıetti. Meniń oıymsha, bul óte jaqsy jaýap. Barlyq saıası kóshbasshylardy, bıznes jáne qoǵam kóshbasshylaryn birigip jumys isteýge, halyqaralyq uıymdarǵa qoldaý kórsetýge shaqyramyn», - dep túıindedi sózin Pan Gı Mýn.

Aıta keteıik, XI Astana ekonomıkalyq forýmy elordada 17-19 mamyr kúnderi ótedi. Buǵan deıingi forýmdarda jahandyq ekonomıka, tsıfrlandyrý jáne taǵy basqa máseleler qaralsa, bıylǵy forým kezinde resýrstar, robotızatsııa, adamzattyń ózgerýi, agroónerkásip salasyndaǵy jetistikter, densaýlyq salasynyń máseleleri talqylanady.

Bıyl forýmǵa álemniń túrli elderinen 500-ge jýyq spıker qatysady. Bul AEF-tiń rekordtyq kórsetkishi. Top-spıkerler arasynda Frantsııanyń burynǵy prezıdenti Fransýa Olland, BUU-nyń burynǵy bas hatshysy Pan Gı Mýn, Dúnıejúzilik banktiń Eýropa jáne Ortalyq Azııa jónindegi bas ekonomısi Gans Tımmer, fızık, fýtýrolog Mıtıo Kaký, Golman Sachs burynǵy tóraǵasy Djım O'Nıl, Apple kompanııasynyń negizin qalaýshylardyń biri Stıv Voznıak, Reseı prezıdenttigine úmitker bolǵan Ksenııa Sobchak jáne ózge de tulǵalar bar.  

Forýmnyń alǵashqy eki kúni kún tártibindegi jahandyq máselelerge arnalady, úshinshi kúni spıkerler QR Úkimetiniń, sarapshylar qoǵamdastyǵynyń ókilderimen alty baǵyt boıynsha jumys júrgizetini kútilýde.