AEF ótkizýge 1,4 mlrd teńge jumsalýy oryndy - Rýslan Jemkov
«Bul forým úshin respýblıkalyq bıýdjetpen 1,4 mlrd teńge kóleminde qarajat maquldanǵan bolatyn. «Astana EKSPO-2017» Ulttyq kompanııasynyń ashyq portalynda ashyq satyp alý júrgizdi. Onyń bári jarııalanǵan. Tehnıkalyq jabdyqtaý men bezendirý, pıar-qoldaý baǵytyndaǵy úlken konkýrsqa 6 kompanııa qatysty. Tenderlik kampanııa birneshe táýlikke sozylyp, jeńimpaz anyqtaldy. Kompanııalardyń baǵalyq usynystary men mundaı forýmdy ótkizý múmkindikteri tekserildi. Jeńimpaz - HBTV kompanııasy. Biz ony jasyryp otyrǵan joqpyz. Barlyq aqparat ashyq kózderde jarııalandy», - dedi Rýslan Jemkov OKQ-da ótken baspasóz máslıhatynda.
«Astana EKSPO-2017» UK» AQ Basqarýshy dırektory sonymen birge mundaı forýmdy ótkizýge tym kóp qarajat jumsalyp jatqan joq pa degen suraqqa jaýap berdi.
«Eldegi eń úlken konferentsııa úshin - barlyq qajettilikke jaýap bola alarlyq oryndy soma. Bizde 50 sessııa, tipti bir ýaqytta 9 shara qatar ótedi. Onyń ústine Kongress-ortalyq - bazalyq negizgi lokatsııa bolsa, Hılton qonaq úıi qosymsha lokatsııa retinde qyzmet kórsetedi. «Astana» Halyqaralyq qarjy ortalyǵynda da birshama sessııa ótkiziledi. Rıts Karlton men Rıksosta da forýmdar uıymdastyrylady. Ulttyq bank pen Halyqaralyq valıýta qory ózderiniń dóńgelek ústelin The St. Regis Astana-da ótkizgeli otyr. Demek, mundaı aýqymdy sharalar men alańdar úshin ketetin shyǵyn oryndy dep esepteımiz», - deıdi ol.
Eske sala ketsek, «Ekonomıkalyq zertteýler ınstıtýty» AQ Basqarma Tóraǵasy Erlik Qarajan 16-17 mamyrda «Yntalandyrýshy ósim: Adamdar. Qalalar. Ekonomıkalar» taqyrybynda ótetin HІІ Astana ekonomıkalyq forýmyna qandaı meımandar keletinin jarııalaǵan bolatyn.
