AEF-ke keletin álemdik spıkerlerge qansha aqsha tólenedi
«Bıylǵy Astana ekonomıkalyq forýmynyń ereksheligi - uıymdastyrýshy komıtettiń kelisimimen gonorardy barynsha alyp tastadyq. Gonorardyń shyǵyny ádettegi ereje boıynsha demeýshilerdiń qoldaýymen jabylady. Demek, biz óz áriptesterimiz - qosalqy uıymdastyrýshylarmen kelise otyryp, spıkerlerdi ózderi alyp keletindeı jumys júrgizip otyrmyz. Osylaısha, bul baǵytqa respýblıkalyq bıýdjetten aqsha jumsamasaq deımiz. Tıisinshe, spıkerlerdiń qaısysy qansha aqsha alatynyn men naqty aıta almaımyn. Jalpy, ózderińiz túsinesizder ǵoı, bári de spıkerdiń deńgeıine, onyń sóılep, jetkize bilýine baılanysty bolady. Ondaǵy soma - 1 myń dollar jáne odan joǵary», - deıdi Rýslan Jemkov.
Dırektordyń aıtýyna qaraǵanda, spıkerlerdiń kóbi tegin keledi.
«Demek, olar qandaı da bir seriktestik qarym-qatynas pen qandaı da bir kelisim aıasynda tegin keledi. Aıta keteıin, qazirdiń ózinde 100 mln teńgeni únemdep otyrmyz. 100 mln teńge úlken tenderdi ótkizýdiń qorytyndysy boıynsha únemdeldi», - deıdi ol.
Rýslan Jemkovtyń aıtýynsha, forýmdy ótkizýge kómek kórsetip jatqan 10 shaqty demeýshi bar.
«Olardyń báriniń atyn atamaı-aq qoıaıyn. Demeýshilik kómek 5 mln teńgeden bastalady. Sessııanyń demeýshisi, óz esebinen meımandarǵa arnalǵan stendti daıyndaýǵa nıet bildirgen demeýshiler barshylyq», - deıdi ol.
Eske sala ketsek, «Ekonomıkalyq zertteýler ınstıtýty» AQ Basqarma Tóraǵasy Erlik Qarajan 16-17 mamyrda «Yntalandyrýshy ósim: Adamdar. Qalalar. Ekonomıkalar» taqyrybynda ótetin HІІ Astana ekonomıkalyq forýmyna qandaı meımandar keletinin jarııalaǵan bolatyn.
Óz kezeginde «Astana EKSPO-2017» UK» AQ Basqarýshy dırektory Rýslan Jemkov elordada ótetin Halyqaralyq ekonomıkalyq forýmǵa ketetin qarajattyń oryndy jumsalatynyn aıtqan edi. Onyń aıtýynsha, forýmdy uıymdastyrý boıynsha júrgizilgen tender ádil ótkizilip, onyń qorytyndysy «Astana EKSPO-2017» UK» AQ saıtynda jarııalanǵan.
