AEF aıasynda sheteldiń kompanııalarymen 10 kommertsııalyq qujatqa qol qoıý josparlanýda - QR IDM

ASTANA. QazAqparat - QR Investıtsııa jáne damý mınıstrligi Astana ekonomıkalyq forýmy aıasynda sheteldiń kompanııalarymen 10 kommertsııalyq qujatqa qol qoıý josparlanýda. Bul týraly búgin Astanada baspasóz máslıxaty kezinde QR IDM baspasóz xatshysy Qaısar Jumabaıuly málim etti.

«Astana ekonomıkalyq forýmy aıasynda sheteldiń kompanııalarymen 10 kommertsııalyq qujatqa qol qoıý josparlanýda. Atap aıtqanda, Germanııa, Italııa, Qytaı, Polsha elderiniń kásipkerlerimen energetıka, agroónerkásiptik keshen, metallýrgııa, xımııa jáne tamaq ónerkásibi, ınfraqurylym salalarynda kelisimder jasalady», - dedi ol.

QR IDM forým barysynda birqatar meımandarmen, sheteldik mınıstrlermen kezdesýler ótkizedi. Olardyń qatarynda Sıngapýrdyń Saýda jáne ındýstrııa mınıstri, Latvııanyń Kólik mınıstri, Shrı-Lankanyń Ónerkásip mınıstri, Irannyń Jańa texnologııalar jónindegi vıtse-mınıstri, EDQB basshysy bar. Taraptar birqatar mańyzdy máselelerdi sóz etedi, sonymen qatar birlesken jobalalardyń qazirgi jaǵdaıyn talqylaıdy.

Onyń ústine 27 mamyr kúni Sheteldik ınvestorlar keńesi ótedi. Kezdesý taqyryby - «Astana - xalyqaralyq qarjy ortalyǵy».

«Oǵan EDQB, Chevron, «ERG», «MetroCash&Carry», «JP Morgan&Co.», «Citigroup», «Baker&McKenzie», «Ernst&Young», «EBR», «Lýkoıl» syndy álemdik kompanııalardyń basshylary qatysady dep kútilýde. Sheteldik ınvestorlar keńesi bizdiń elde jumys istep jatqan ınvestorlarǵa el bıligimen suxbat qurýǵa múmkindik beretin alań», - dedi ol.