AEF: «Astana» halyqaralyq qarjy ortalyǵyn damytý máseleleri talqylanady

ASTANA. QazAqparat - Mamyrdyń 25-26-synda «Jańa ekonomıkalyq shyndyq: ártaraptandyrý, jańǵyrtýlar jáne bilim ekonomıkasy» atty taqyryppen ótetin Astana ekonomıkalyq forýmy aıasynda «Qarjylyq ósýdiń álemdik tájirıbesi: Astana Halyqaralyq qarjy ortalyǵyn damytýǵa arnalǵan mehanızmder men quraldar» sessııasyn ótkizý josparlanyp otyr. Sharany «Astana» halyqaralyq qarjy ortalyǵy ákimshiligi» AQ men «Ǵalymdardyń Eýrazııalyq ekonomıkalyq klýby» Qaýymdastyǵy birlese uıymdastyrmaq.

Sessııa barysynda Astana halyqaralyq qarjy ortalyǵy múmkindikteri týraly áńgime órbip, Ortalyqqa otandyq jáne sheteldik ınvestıtsııalar aǵymyn yntalandyrý jaıy talqylanatyn bolady. Budan bólek, sarapshylar «Astana halyqaralyq qarjy ortalyǵynyń» damý bolashaǵyn, sheteldik álemdik qarjy ortalyqtaryn qurý jáne damytýdyń jetistikti tájirıbesin qoldaný múmkindikterin talqylaıdy.

Sarapshylar pikirinshe, «Astana Halyqaralyq qarjy ortalyǵyn» qurý arqasynda Qazaqstanǵa tek aımaqtyq saýdalyq qana emes, sonymen birge, iri saýdalyq mámileler men tólemder júzege asyrylatyn qarjylyq hab bolýǵa zor múmkindikteri ashylady. Osyǵan oraı, forým alańyndaǵy talqylaýǵa - bankter men startaptardyń qarjylyq tehnologııalarynyń ózara qarym-qatynastary máseleleri, memlekettik retteý jáne qoldaý, qarjylyq tehnologııa quraldary shyǵarylady. Sonymen birge «Blockchain» tehnologııalarynyń múmkindikteri men boljaldy qaterlerin qamtıtyn qarjylyq jańa tehnologııalar máselelerine nazar aýdarylmaq.

Budan bólek, forým barysynda turaqty damý jáne ekologııalyq qaterlerge de erekshe kóńil bólinedi. Dástúr boıynsha forýmnyń belgili qonaqtary arasynda ár túrli salalardaǵy Nobel syılyǵynyń ıegerleri qatysady. Bıyl AEF ekonomıka boıynsha Nobel syılyǵynyń ıegerleri Edvard Preskott, Krıstofer Pıssarıdes pen Tomas Sardjent jáne basqa ǵalymdar shaqyrylǵan.