AEF aldaǵy jyldarǵa damýdyń strategııasyn aıqyndaıdy - sarapshy

ASTANA. QazAqparat - AEF pikiralmasýlary sarapshylar men saıasatkerlerge aldaǵy 3 jylǵa damýdyń bolashaq ulttyq strategııasyn aıqyndaýǵa múmkindik beredi. Bul týraly QR Prezıdenti janyndaǵy Qazaqstannyń strategııalyq zertteýler ınstıtýty (QSZI) dırektorynyń orynbasary Sanat Kóshkimbaev málim etti, dep habarlaıdy QazAqparat.

«XI Astana ekonomıkalyq forýmy Qazaqstan úshin mańyzdy oqıǵalardyń biri, sebebi bul shara jahandyq ekonomıka tıisti týrbýlenttilikti sezinip otyrǵan kezeńde ótkizilip keledi. Jalpy, halyqaralyq júıe de turaqsyzdaý jáne jańa syn-qaterler beleń alýda. Qazaqstan osy syn-qaterlerge jaýap izdeýde, sondaı-aq saqtandyrýshy tetikterdi paıdalanyp keledi. Forým jahandyq deńgeıde damýdyń bolashaq strategııasyn aıqyndaý boıynsha Qazaqstannyń osy aýqymdy pikiralmasýdyń qatysýshysy ekenin kórsetip otyr. Onyń ishinde AEF maqsatyna ekonomıkalyq damýdyń ulttyq strategııalaryn jahandyq kún tártibimen úılestirý kiredi. Búginde álemniń ózgerip jatqanyn kórip otyrmyz. Sondyqtan Qazaqstan úshin úılesimdi damýmen qatar, aldymyzda turǵan ekonomıkalyq syn-qaterlerdiń aldyn alý mańyzdy bolyp tur. Sáıkesinshe, AEF-tiń qorytyndy pikiralmasýlary qazaqstandyq sarapshylar men saıasatkerlerge aldaǵy 2-3 jylǵa damýdyń bolashaq ulttyq strategııasyn aıqyndaýǵa múmkindik beredi», - dep toqtaldy Kóshkimbaev «XI AEF: jahandyq syn-qaterler jáne HHІ ǵasyrdaǵy Qazaqstan» atty dóńgelek ústel otyrysynda.

Onyń sózine qaraǵanda, jahandyq ekonomıkany damytýdyń eń mańyzdy baǵyttarynyń biri tsıfrlandyrýǵa baılanysty. Búginde bul protsess óte ekpindi, sebebi osy saladaǵy esepteýler jyl nemese aılarǵa emes, kúnder men aptalarǵa negizdelgen.

«Tehnologııalar álemdi, elderdi ózgeriske ushyratyp jatyr. Osy oraıda buǵan deıin resýrstar eksportyna nemese óndiristegi arzan jumys kúshine ekpin qoıǵan memleketterdiń básekege qabilettigi tómendeýde. Sondyqtan bizge ınnovatsııalyq ekonomıkany, ıaǵnı bilim men tehnologııa ekonomıkasyn damytý kerek», - dedi sarapshy.

Onyń atap ótýinshe, qazirgi kezde ekonomıkalyq sýbektilerdegi ári bıznes-qoǵamdastyqtaǵy tártipti ózgertý kerek. Bul turǵyda atalǵan forýmnyń máni men mańyzynda osy máseleler qamtylǵan.

«Biz qazirgi kezde jańa syn-qaterlerdiń aldynda turmyz. Qazaqstan damyǵan 30 eldiń qataryna qosylý strategııalyq maqsaty boıynsha júrip keledi. Alaıda ózge de kóptegen elder damyp kele jatqanyn, al keıbiri  qarqyndy túrdi ilgerilegenin umytpaýymyz qajet. Sondyqtan bizdiń ósim qarqynymyzdy jandandyrý úshin ekonomıkalyq kún tártibimizdi taǵy qarap shyǵýymyz kerek», - dedi Sanat Kóshkimbaev