AEF: Aqparattyq keńistiktegi haýsty qalaı aýyzdyqtaýǵa bolady

ASTANA. QazAqparat - Jalǵan aqparattyń álemge qaýip tóndirip turǵany aıqyn. Onyń kúshi tipti tutas memleketterdi tirestirip qoıýǵa qaýqarly. Bul týraly Qazaqstan Prezıdenti Nursultan Nazarbaev kúni keshe Global Challenges Summit 2018 forýmynda aıtyp ótken bolatyn. Al AQSh sekildi alpaýyt elderde jalǵan aqparattarmen kúres qalaı júrgizilip jatyr? Ol jaıly forýmnyń búgingi sessııasynda Florıdadaǵy «Tampa Bay Times» basylymynyń faktchekıngti «Politifact» jobasynyń shtattaǵy jazýshysy Djon Grınberg áńgimelep berdi.

Djon Grınberg aqparattyq keńistiktegi haýsty qalaı aýyzdyqtaýǵa bolatyny týraly sóz qozǵady.

«Bizdiń ról - aqparattyq aǵymdaǵy qoqystardy jınap alyp, tıisti jerge jiberý. Ásirese, jalǵan aqparattardyń aǵymyn tejep, qazbalap, taldaý júrgizemiz. Saıasatkerler óz basqarýyndaǵy memlekettiń 20 jyldan keıin beınesi týraly málimdeme jasady delik. Eger ol saıasatkerdiń bul tujyrymdamasy qandaı da bir negizge súıengen bolsa, onyń súıengen málimetteriniń shynaıylyǵyn zerttep, aıqyn emes bólikterin syrtqa shyǵaramyz. Demek, biz keıbir málimdemeler anyq bolmaı shyǵady dep esepteımiz», - deıdi ol.

Onyń aıtýynsha, «Politifact» saıtynyń mamandary taldaý júrgizip, málimdemelerdi «anyq», «anyq emes» jáne «múlde qate» degen sanattarǵa bólip, baǵa beredi.

«Máselen, eger bireý kópti aldap turǵanyn, málimdemeniń artynda jalǵandyq turǵanyn bilsek, biz tujyrymnyń múlde shyndyqqa sáıkes kelmeıtinin jarııalaımyz. Bizdiń jumysymyz - osylaısha aqparattyq aǵyndy tazartyp, anyq emes málimdemelerdi anyqtaý. Kelesi qadam - eń mańyzdy. Biz osy aqparatty bizdiń veb-saıtta jarııa etemiz. Aıtpaqshy, bizdiń saıt óte tanymal. 2016 jylǵy saılaý kezinde (AQSh-taǵy -avt.) 255 mıllıon paraqsha jarııa etildi. Bizdiń saıtqa kelip túsken ótinimderdiń de sany óte kóp boldy. Bizdiń málimetter barlyq áleýmettik jelilerde keńinen taralyp, tujyrym retinde qoldanylyp otyrdy», - deıdi Djon Grınberg.

Ol óz sózinde aqparattyq haýs týraly sóz qozǵap, azamattar aqparatty qabyldaýda aqyldy tutynýshy bola bilý kerektigin atap ótti.

«ıAǵnı, bizdiń ózimiz aqparattyń qanshalyqty ras-ótirigine baǵa bere bilýge tıispiz. Bizge sonymen qatar, osy aqparat ary qaraı qalaısha taralýy, damýy múmkin ekenin túsiný kerek. Osylaısha, árbir azamat ıntellektýaldy aqparatty tutynýshy bolýymyz kerek. Jalǵan aqparattardyń taralýy dese de, bizdi alańdatatyn máselelerdiń biri bolyp otyr», - dep túıdi Djon Grınberg.

Aıta ketsek, «Politifact» - Florıdadaǵy eń taralymy mol «Tampa Bay Times» basylymynyń faktchekıng jobasy. Saıt 2007 jyly jumysyn bastaǵan. Pýlıttser syılyǵyne ıe bolǵan «Politifact» saıasatkerlerdiń málimdemesiniń shyn-ótirigin tekserý jumysymen aınalysady.