AEF-2019: Tsıfrlandyrý Qazaqstannyń aýyl sharýashylyǵyn qalaı damytty
«AÓK-ti tsıfrlandyrý klımattyń ózgerýine beıimdelý syn-qaterin azaıtady, egindi arttyryp, mal basyn kóbeıtedi, bıznes-protsesterdi der kezinde josparlaýǵa múmkindik beredi. «Aqyldy» basqarý sheshimin qabyldaý úshin fermer spýtnıkpen túsirilgen sýretter, jer óńdeý algorıtmderi, joǵary tehnologııaly datchıkter, mobıldi qosymshalar men GPS júıe syndy tsıfrlyq tehnologııalardy meńgerýi tıis», - dep atap ótti mınıstr elordada ótken HІІ Astana ekonomıkalyq forýmynda.
Onyń aıtýynsha, ótken jyly bekitilgen e-AÓK baǵdarlamasy memlekettik qoldaý sharalaryn avtomattandyrýǵa, dálme-dál aýyl sharýashylyǵy jobalaryn júzege asyrýǵa jáne bıznes pen AÓK ókiliniń ózara yntymaqtasýyna baǵyttalǵan.
«Aýyl sharýashylyǵy sýbsıdııalaryn alý protsedýrasy tolyq avtomattandyrylǵan. Sýbsıdııalaý protsesin avtomanttandyrý men fermer jumysyn jeńildetý úshin egistik jeri 100% tsıfrlandyryldy. Osy arqyly fermer óz alqabyn úıden shyqpaı-aq basqarý múmkindigin aldy. Kóktemgi, sýarý, jınaý jumystary úshin jeńildikpen beriletin dızeldi otyndy da elektrondy túrde bólý jumystary júrýde. Ósimdik jáne mal sharýashylyǵy baǵytynda dálme-dál aýyl sharýashylyǵy júıesi engiziledi. Agronomııanyń jańa tehnologııalary men tehnıkasyn qoldaný arqyly pılottyq nysandarda astyq 2,5 ese kóbirek jınaldy jáne shyǵyn 20% azaıǵan», - dedi S. Omarov.
Mal sharýashylyǵynda zamanaýı smart júıelerdi qoldaný oń nátıjesin bergen. Pılottyq jobada sút saýý jumystary 20% kóbeıip, tól ósirý - 30% artqan.
«Aýyl sharýashylyǵy ónimin qujattyq baqylaý júıesi de engizý satysynda tur. Bul arqyly elimizdiń azyq-túlik qaýipsizdigin, eksport-ımporttyń ashyqtyǵyn qamtamasyz etýge bolady. Taýarlarǵa únemi baqylaý jasalyp, Qazaqstan naryǵy ınvestıtsııalyq turǵyda tartymdy bola túsedi. Ulttyq keńistiktegi derekter ınfraqurylymy jobasy aıasynda koordınat naqtylyǵyn arttyrý, keńistiktegi derekter ashyqtyǵyn qamtamasyz etý josparlanǵan. Biryńǵaı memlekettik koordınalar júıesi ornatylyp, respýblıkanyń barlyq aýmaǵyn qamtıdy», - dedi mınıstr.
Eske sala ketsek, elordada XII Astana ekonomıkalyq forýmy «Yntalandyrýshy ósý: adamdar, qalalar, ekonomıkalar» taqyrybynda ótip jatyr. Forým jumysyna álemniń 74 elinen sarapshylar, saıasatkerler, bıznesmender men ǵalymdar qatysýda.
Forýmǵa qatysatyn sheteldik qonaqtar qatarynda Halyqaralyq valıýta qorynyń basqarýshy dırektory Krıstın Lagard, Qytaı Halyq Respýblıkasy Memlekettik keńesiniń vıtse-premeri Han Chjen, Armenııa Respýblıkasynyń Prezıdenti Armen Sarkısıan, Nokia Corporation dırektorlar keńesiniń tóraǵasy Rısto Sıılasmaa, ekonomıka boıynsha Nobel syılyǵynyń laýreaty Pol Gomer syndy tanymal tulǵalar bar.
