AEA-lardy damytýdyń jańa modeli ázirlenip jatyr

ASTANA. KAZINFORM — Arnaıy ekonomıkalyq aımaqtardy damytýdyń jańa modeli ázirlenip jatyr. Bul týraly Ónerkásip jáne qurylys mınıstrliginen málim etti.

— Prezıdent 2025 jylǵy 8 qyrkúıektegi Qazaqstan halqyna Joldaýynda arnaıy ekonomıkalyq aımaqtardyń ınvestıtsııa tartýdyń, ónerkásipti damytýdyń jáne óńirlerdiń ekonomıkalyq belsendiligin arttyrýdyń mańyzdy quraldarynyń biri ekenin atap ótti. Sondaı-aq olardyń qyzmetiniń tıimdiligin arttyrý qajettigin kórsetti. Osyǵan baılanysty Úkimetke AEA-ny damytýdyń jańa modelin pysyqtaý, sondaı-aq arnaıy ekonomıkalyq aımaqtardy jeke kompanııalardyń, onyń ishinde sheteldik operatorlardyń basqarýyna berý máselesin qaraý tapsyryldy, — dep atap ótedi mınıstrlikten agenttik saýalyna oraı.

Vedomstvo atalǵan tapsyrmany iske asyrý arnaıy ekonomıkalyq aımaqtardyń qyzmetin retteıtin zańnamalyq jáne zańǵa táýeldi aktilerge ózgerister engizýdi talap etýi múmkin ekendigine nazar aýdartady.

— Mınıstrlik atalǵan tapsyrmany oryndaý aıasynda AEA-ny damytýdyń ınvestıtsııalyq tartymdylyǵyn arttyrýǵa, basqarý tetikterin jetildirýge, aımaqtardyń mamandanýyn kúsheıtýge jáne jobalardy irikteý sapasyn arttyrýǵa baǵyttalǵan jańa tásilderin qalyptastyrý boıynsha jumys júrgizýde. AEA-ny damytýdyń jańa modeli bekitilgennen keıin mınıstrlik qosymsha aqparat usynýǵa daıyn, — dedi Ónerkásip mınıstrligi.

Buǵan deıin ınvestordyń AEA ınfraqurylymyn salýǵa ketken shyǵynyn óteý tetigi engiziletinin jazǵan edik.