AEA basqarýshy kompanııalaryn bólek shyǵarý kerek - Saǵyntaev
ASTANA. QazAqparat - QR Premer-Mınıstri Baqytjan Saǵyntaev arnaıy ekonomıkalyq aımaqtardyń basqarýshy kompanııalaryn bólek shyǵarýdy usyndy, dep habarlaıdy QazAqparat.
«Jergilikti atqarýshy organdar ınfraqurylym úshin respýblıkalyq bıýdjetten qarajat alýǵa ǵana qulyqty. Aqshany alyp, qurylys júrgizedi jáne qalǵan másele qyzyqtyrmaıdy. Buǵan deıin qurylǵan daıyn aýmaqtarda jumys qalaı júrip jatyr? Munyń bári basqarýshy kompanııaǵa tikeleı baılanysty. Oǵan ákimdiktiń bir bólimshesi, memlekettik-kommýnaldyq mekeme retinde qaraıdy. «Qorǵas - Shyǵys qaqpasynda» jumys múldem basqasha júrip jatyr, onda sheteldikter ǵana jumys isteıdi», - dedi Saǵyntaev Úkimettiń búgingi otyrysynda.
Sondaı-aq, Premer-Mınıstr elimizde AEA qurylǵan 10 iri aımaq bar ekenin jáne táýir basqarýshy kompanııalardy uıymdastyra almasa, eshteńe ónbeıtinin basa aıtty.
«Júz paıyz qamtamasyz etsek te, qandaı nátıje kórip otyrmyz? On-on bes jyl jumys istedik, endi baǵytymyzdy ózgerteıik deımiz be? Oryn toltyra almaı, tilek bildirgenderdiń bárin shaqyra beremiz be? Bul da basqarýshy kompanııanyń qateligi. Eger durys jumys isteıtin basqarýshy kompanııa bolǵanda, baǵytymyzdy ózgertip, keńeıtip, kásipkerlerdiń barlyǵyn shaqyrmas pa edik?», - dep, Úkimet basshysy oblys ákimderinen AEA basqarýshy kompanııalaryna erekshe nazar aýdarýdy surady.
«Bul jumysty ákimdik óz kúshimen atqara almaıdy, oǵan bárimizdiń kózimiz jetti. Durysy - basqara biletin mamandardyń qolyna berý», - dedi Premer-Mınıstr.
