Advokatýranyń quqyqtyq mártebesi Konstıtýtsııada alǵash ret bekitiledi

ASTANA. KAZINFORM — Jańa Konstıtýtsııanyń jobasynda sot isin júrgizý nysandarynyń qatary artty. Bul týraly Konstıtýtsııalyq reformalar jónindegi komıssııanyń otyrysynda Konstıtýtsııalyq Sot tóraǵasynyń orynbasary Baqyt Nurmuhanov málim etti. 

— Segizinshi «Sot tóreligi. Prokýratýra. Quqyq qorǵaý tetikteri» degen kelesi bólimge sot bıligine, prokýratýra organdaryna, Adam quqyqtary jónindegi ýákilge, advokattarǵa jáne zań kómegin kórsetetin ózge tulǵalarǵa qatysty erejeler endi. Sot isin júrgizý nysandarynyń qatary artty, sot tóreliginiń konstıtýtsııalyq qaǵıdattary kúsheıtildi, sýdıalardyń táýelsizdigi nyǵaıdy, sot júıesiniń kadr máseleleri sheshildi, — dedi Baqyt Nurmuhanov jańa Konstıtýtsııanyń jobasyn tanystyrý kezinde.

Sonymen qatar ol advokatýranyń quqyqtyq mártebesi Konstıtýtsııada alǵash ret bekitilgenin atap ótti.

Budan buryn habarlanǵandaı, jańa Konstıtýtsııanyń jobasyndaǵy úshinshi «Prezıdent» bólimine tujyrymdamalyq turǵydan qaıta qaralǵan jáne múlde jańa erejeler endi.