Advokatýraǵa progressıvti ózgerister engizilip jatyr - Serik Aqylbaı
ASTANA. QazAqparat - Qazaqstandaǵy advokatýra salasyna jasalyp jatqan ózgerister bul salany demokratııalandyryp, halyqqa jaqyndata túsý úshin jasalyp jatyr. Qazaqstan Zańgerler odaǵy tóraǵasynyń mindetin atqarýshy Serik Aqylbaı Qazaqstan zańgerler odaǵynyń ekinshi sezinde osylaı pikir bildirdi, dep habarlaıdy «QazAqparat» HAA tilshisi.
«Men eger tikeleı aıtatyn bolsam, advokattardyń jańa zań jobasyna qarsy shyǵatyn eshqandaı quqyǵy joq. Egemendik alǵaly beri sot, prokýratýra, tergeý júıesiniń barlyǵy ózgerdi. Mysaly, prokýrorlar 5 jyldan artyq otyrmaıdy. Sottar da solaı. Al sottardyń tártiptik kollegııasyna tek qana sottar emes, qoǵamnan da, joǵarǵy sot keńesinde prokýratýranyń da, ádilet mınıstrliginiń de ókilderi otyrady. Qoǵamdyq ókil retinde talaı kollegııaǵa qatystym. Al advokatýrada bul jumys tek qana óziniń ishinde qaınap jatyr. Olardyń tártiptik máselelesin advokattar ǵana qaraıdy. Olardyń tóraǵalarynyń ishinde 30 jyl boıy otyrǵandary bar», - deıdi Serik Aqylbaı «Advokattyq qyzmet jáne zań kómegi týraly» jańa zań jobasy týraly.
Onyń aıtýynsha, advokatýrada bul ábden qatyp qalǵan dúnıe. Sony retke keltirý úshin zań jobasy usynylyp jatyr.
«Advokatýrany demokratııalandyrý, quqyq berý, aıyptalýshylarmen olardyń quqyqtaryn teńestirý úshin jasalyp jatyr. ıAǵnı, bul óte progressıvti, alǵa jyljytýshy zań. Taǵy bir jaǵyn qarasańyzdar, advokattar kollegııasyna kirý úshin 800 myń teńgege deıin alǵashqy jarna tóleý kerek. Ony kez kelgen azamattyń qaltasy kótere bermeıdi. Oqýdy úzdik bitirgender advokat bola almaı júr. Sebebi, aqshasy joq. Odan basqa bolashaq advokattar synaqtan ótý úshin taǵy shyǵyndalady da, aınalyp kelgende 1 mıllıon teńgedeı aqsha kerek bolady», - deıdi ol.
Sondaı-aq, Serik Aqylbaı Qazaqstanda 4000 myń adamǵa bir ǵana advokattan keletinin aıtady.
«Bul TMD elderi ishindegi eń tómen kórsetkish. Damyǵan elderde 200 adamǵa bir advokattan keledi. Sondyqtan advokatýra salasyn demokratııalandyryp, halyqqa jaqyndata túsý úshin bunyń bári jasalyp jatyr. Eń bastysy bul ózgeris halyqtyń quqyǵyn durys qorǵaý úshin ázirlendi. Sondyqtan bul zańǵa tek qana óziniń mańyndaǵy mansabyn qorǵaý úshin kúsh salyp jatqandar ǵana qarsy shyǵyp jatyr», - dep túıdi Serik Aqylbaı.
