Advokatýra máseleleri jónindegi zań jobasy birinshi oqylymda maquldandy
ASTANA. 1 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine advokatýra máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Zań jobasy halyqqa bilikti zań kómegin tıisinshe kórsetýdi qamtamasyz etýge, sondaı-aq onyń sapasyn baqylaý tetikterin belgileýge baǵyttalady.
Buǵan qatysty qujatta attestattaý komıssııasynyń qyzmetin jáne advokattyq qyzmetpen aınalysýǵa úmitker adamdardyń taǵylymdamadan ótý protsesin retteý sharalary kózdeledi. Advokattar úshin uzaqtyǵy 6 aıdan 1 jylǵa deıin belgilengen taǵylymdamadan ótý merzimin ulǵaıtý qarastyrylady. Budan bólek, advokattardy tártiptik jaýaptylyqqa tartý tártibi, onyń tizbesi aıqyndalady.
Zań jobasy boıynsha advokattar alqalary odaǵyn qurý tártibi naqtylanyp, onyń negizgi maqsattary men mindetteri kórsetiledi.
Zań jobasy ekinshi oqylymǵa ázirleý úshin bas komıtetke tapsyrylady.
