Advokattyń tergeý qujattarynyń kóshirmelerin alý quqyǵy bolýy kerek - mınıstrlik

ASTANA. QazAqparat – Qylmystyq-protsessýaldyq kodekske advokattarǵa qorǵaýyndaǵy tulǵany tergeý qujattarynyń kóshirmelerin alý quqyǵyn berýdi kózdeıtin túzetýler engizilýi múmkin. Bul jaıynda Ádilet vıtse-mınıstri Alma Muqanova Májilis depýtattaryna qylmystyq zańnamaǵa engiziletin túzetýlerdi tanystyrý kezinde aıtty, dep habarlaıdy QazAqparat tilshisi.

«Qazirgi tańda qorǵaýshynyń quqyqtaryn qorǵaý úshin negizgi mańyzy bar keıbir qujattarmen advokattar tek tanysýǵa quqyly. Advokattar azamattardy qorǵaý úshin qajetti aqparatqa ıe bolýy kerek. Óıtkeni, olar zańǵa sáıkes ózderiniń qorǵaýshylarynyń múddesi úshin áreket etedi», - dedi ol.

Naqtyraq aıtsaq, Qylmystyq-protsessýaldyq kodekstiń 70-babynda advokattarǵa ǵylymı-tehnıkalyq quraldardyń kómegimen sotqa deıingi tergep-tekserýdi júzege asyratyn tulǵadan myna qujattardyń kóshirmelerin alýǵa múmkindik beretin túzetý usynylady:

1) qorǵaýshynyń qatysýymen júrgizilgen tergeý jáne is júrgizý áreketteriniń hattamalary;

2) bultartpaý sharasyn qoldaný týraly sotqa deıingi tergep-tekserý organynyń onyń qorǵaýshysyna qatysty qaýlylary jáne bultartpaý sharasyn qoldanýǵa sanktsııa berý týraly sot aldyndaǵy ótinishhattar.

Qazir advokat iske kirisken sátten bastap kórsetilgen qujattarmen tek tanysýǵa quqyly.