Advokattyq qyzmetpen aınalysýǵa negizdelgen lıtsenzııany alý talaptary kúsheıtildi
ASTANA. 17 qańtar. QazAqparat - 2012 jylǵy 20 qańtarda «Qazaqstan Respýblıkasynyń keıbir zań aktilerine advokatýra máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańy kúshine enedi.
Ádilet mınıstrliginiń remı saıtynyń málimetine qaraǵanda, Zań erejeleri advokatýra qyzmetin uıymdastyrýdy odan ári jetildirýge jáne advokat kásibine qoljetimdiligi máseleleri boıynsha sybaılas jemqorlyqty azaıtýǵa baǵyttalyp otyr.
Naqty atap kórsetkende, Zańda tikeleı taǵylymdamadan jáne attestattaýdan ótý tártibiniń negizgi erejeleri bekitilip, sondaı-aq advokattyq qyzmetpen aınalysý quqyǵyna úmitker tulǵalar úshin attestattaýdy qabyldaý júıesin ortalyqsyzdandyrý kózdelgen.
Advokattyq qyzmetpen aınalysý úshin lıtsenzııa alýǵa úmitker tulǵalarǵa qatysty qoıylatyn talaptar kúsheıtildi. Onyń ishinde, taǵylymdamadan ótý merzimi uzartylyp, búgingi tańda ol alty aıdan bir jylǵa deıin belgilendi.
Lıtsenzııa alý protsedýrasy álemdik standarttarǵa sáıkestendirildi, ıaǵnı azamattar lıtsenzııa alý úshin birinshi satyda taǵylymdamadan, odan keıin attestattaýdan ótedi.
Sonymen qatar, Qazaqstan tarıhynda birinshi ret aýmaqtyq advokattar alqalary mindetti túrde músheligine enetin Respýblıkalyq advokattar alqasy qurylady.
Respýblıkalyq deńgeıdegi osyndaı qurylymnyń bolýy advokatýranyń birigýine, sondaı-aq táýelsizdigi men ózi-ózin basqarý ınstıtýtyn nyǵaıýyna áser etedi.
Zańnyń eleýli quqyqtyq erejeleriniń biri aýyldyq jerlerde advokattyq qyzmetpen aınalysqysy kelgen tulǵalardy bastapqy múshelik jarnadan bosatý bolyp tabylady, ol aýyl halqyn bilikti zańgerlik kómekpen qamtý máselelesin sheshýge múmkindik beredi.
