Advokattyq qyzmet týraly zań jobasy Kelisý komıssııasynda qaralady
NUR-SULTAN. QazAqparat – Parlament Májilisi men Senatynyń depýtattary «Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» zań jobasyn Kelisý komıssııasynda qaıta qaraıdy, dep habarlaıdy QazAqparat tilshisi.
Aıta keteıik, bıyl naýryz aıynyń basynda senatorlar buryn Májilis bekitken zań jobasyn áriptesterine qaıta qaraýǵa qaıtarǵan edi.
«Zańnama jáne sot-quqyqtyq reforma komıteti «Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasyna Qazaqstan Respýblıkasy Parlamentiniń Senaty engizgen ózgerister men tolyqtyrýlaryn qarap shyqty. Senat pozıtsııalarynyń kópshiligi zań jobasynyń normalaryn naqtylaýǵa baǵyttalǵandyqtan, Komıtet olarmen kelisýge bolady dep esepteıdi. Sonyń ishinde, qylmystyq protsesti júrgizetin organnyń advokattardyń kásibı uıymy nemese onyń qurylymdyq bólimsheleri arqyly qorǵaýshy taǵaıyndaý boıynsha sharalardy qabyldaýy týraly qoldanystaǵy normalardy saqtaý usynylǵan. Advokat sottylyǵynyń quqyqtyq saldaryna qatysty normanyń qoldanystaǵy redaktsııasyn qalpyna keltirý usynylady, ol sottylyqty ótegen nemese alyp tastaǵan sátten bastap advokat mamandyǵyna oralýǵa múmkindik beredi», - dedi Májilis depýtaty Snejanna Imasheva.
Sonymen qatar ol Respýblıkalyq advokattar alqasy men Respýblıkalyq zań konsýltanttary alqasynyń jalpy qajettilikterine árbir advokat pen zań konsýltanty úshin keminde 1 aılyq eseptik kórsetkish mólsherinde aı saıynǵy jarnalardy tóleý týraly normalardyń qoldanylý merzimin 2026 jylǵa deıin shekteý usynylyp otyrǵanyn aıtty. Kórsetilgen merzim ótkennen keıin aı saıynǵy jarnalardyń mólsheri men aýdarý tártibin advokattar men zań konsýltanttary derbes belgileıtin bolady.
Onyń aıtýynsha, budan basqa, advokattar men zań konsýltanttarynyń keıbir sanattaryna, onyń ishinde aýyldyq jerlerde jumys istep júrgenderge múshelik jarnalardy tóleýge jeńildikter belgileý usynylǵan. Ádilet organdarynan shyǵarylǵan, sondaı-aq memlekettik organdardyń zań mamandyǵy boıynsha keminde on jyl jumys istegen qyzmetkerlerdi zań konsýltanty retinde attestattaýdan ótkizýden bosatý jónindegi normany alyp tastaý kózdelgen.
«Sonymen qatar, Komıtet Senattyń salystyrma kestesiniń 4-pozıtsııasy, ıaǵnı Respýblıkalyq zań konsýltanttary alqasyn qurýǵa qatysty túzetýdi kelisý komıssııasynyń talqylaýyna shyǵarýdy usynady. Kelisý komıssııasynyń quramyna depýtattar A.Qojahmetov, S.Imasheva jáne A.Platonovty usynamyz», - dedi Snejanna Imasheva.
Jalpy otyrys barysynda depýtattar Májilistiń Zańnama jáne sot-quqyqtyq reforma komıtetiniń Kelisý komıssııasy boıynsha usynysyn maquldady.
Budan buryn habarlanǵandaı, ótken aptada Májilistiń Zańnama jáne sot-quqyqtyq reforma komıtetiniń tóraǵasy Qanat Mýsın týraly Facebook-tegi paraqshasynda tıisti zań jobasy qaıta qaralatanyn jazdy.
https://kaz.inform.kz/news/deputattar-advokat-kyzmeti-turaly-keybir-zan-zhobalaryn-kayta-karaydy_a3763507
