Advokattyń shaǵymynan keıin Atyraýdaǵy tergeý ızolıatoryna qyzmettik tekseris bastaldy

Advokattyń aıtýynsha, №75 mekeme, ıaǵnı Atyraý qalasyndaǵy tergeý ızolıatorynda advokattar men tergeý qamaýyndaǵy adamdar kezdesetin arnaıy bólmelerde beınebaqylaýmen qatar, olardyń áńgimeleri aýdıojazbaǵa jazylady. Nurlan Jolbolov mundaı jaǵdaıda memlekettik organ advokat pen onyń qorǵaýyndaǵy adamnyń áńgimesin tyńdaýǵa, jazýǵa jáne saqtaýǵa tehnıkalyq múmkindik alady dep sanaıdy.

Onyń pikirinshe, bul advokattyq qupııa men adamnyń qorǵaný quqyǵyna qatysty máselelerdi týyndatady. Onyń sózinshe, qorǵaýshy men kúdikti kezdesý barysynda istiń taktıkasyn, dálelderdi, kýálardy, shaǵymdar men ótinishterdi talqylaýy múmkin. Mundaı aqparattyń úshinshi tulǵaǵa qoljetimdi bolýy qorǵaý tarabynyń ustanymyna áser etýi yqtımal.

- Bul – Konstıtýtsııany, Qylmystyq-protsestik kodeksti jáne advokattyq qyzmet týraly zańnamany óreskel buzý, sondaı-aq adamnyń qorǵaný quqyǵyn júzege asyrýǵa tikeleı aralasý jáne advokattyq qyzmetke kedergi keltirý. Olar muny advokattardyń qaýipsizdigin qamtamasyz etý maqsatynda jasady degen ýáj aıtylýy múmkin. Alaıda qaýipsizdikti qamtamasyz etý úshin memlekettik organ kezdesýdi vızýaldy túrde baqylaýǵa quqyly. Biraq advokat pen onyń qorǵaýyndaǵy adamnyń áńgimesiniń mazmunyn tyńdaýǵa quqyǵy joq. Qaýipsizdik maqsatyndaǵy vızýaldy baqylaý men advokatpen qupııa áńgimeni aýdıoǵa jazýdyń arasynda prıntsıpti quqyqtyq aıyrmashylyq bar,-dedi advokat Nurlan Jolbolov.

Advokat máseleniń taǵy bir qyry retinde tergeý ızolıatorlarynyń quqyq qorǵaý organdarymen vedomstvolyq baılanysyn atady. Onyń paıymdaýynsha, advokat pen aıyptalýshy arasyndaǵy áńgimelerdiń aýdıojazbasy basqa qyzmetkerlerge berilýi múmkin.

- Tergeý ızolıatory Іshki ister mınıstrliginiń júıesine kiredi. Sol júıede jedel-izdestirý qyzmetin jáne qylmystyq qýdalaýdy júzege asyratyn bólimsheler de bar. Demek qupııa áńgimelerdi tehnıkalyq quraldar arqyly jazý málimettiń jedel qyzmetkerlerge, tergeýshilerge jáne túrli vedomstvolardyń laýazymdy tulǵalaryna berilýine naqty múmkindik týǵyzady. Al prokýratýra óz kezeginde sotqa deıingi tergep-tekserýdiń zańdylyǵyn qadaǵalaıdy, barlyq quqyq qorǵaý organyna protsessýaldyq basshylyq etedi jáne sotta memlekettik aıyptaýdy qoldaıdy. Sondyqtan qorǵaý tarapynyń ustanymy týraly aqparattyń memlekettik organdardyń qaramaǵynda bolýynyń ózi zańmen belgilengen aıyptaý men qorǵaý arasyndaǵy tepe-teńdikti buzady , – dedi advokat.

Nurlan Jolbolov bul jaǵdaıǵa baılanysty Prezıdentke, Bas prokýratýraǵa, Adam quqyqtary jónindegi ýákilge jáne Respýblıkalyq advokattar alqasyna úndeý jasaǵanyn aıtty.

Ol №75 mekememen shektelmeı, Qazaqstandaǵy advokattar men kúdikti, aıyptalýshy nemese sottalǵan adamdar kezdesetin barlyq mekemede tekserý júrgizýdi usyndy. Atap aıtqanda, aýdıojazbanyń qaı kezeńnen beri júrgizilgenin, qansha kezdesý jazylǵanyn, jazbalarǵa kimderdiń qol jetkizgenin jáne olardyń saqtalýy men qoldanylý tártibin anyqtaý qajet dep sanaıdy.

Sonymen birge advokat aýdıojazba júrgizýge arnalǵan jabdyqtardyń basqa mekemelerde de bar-joǵyn tekserýdi jáne júıege qatysty jazbalar, jýrnaldar men tehnıkalyq derekterdi saqtaýdy surady.

Nurlan Jolbolovtyń pikirinshe, eger onyń aıtqandary rastalsa, másele tek ishki tártiptik tekserýmen shektelmeýi kerek. Ol tıisti quqyqtyq baǵa berilip, zańnamada kózdelgen jaýapkershilik máselesi qaralýy qajet ekenin aıtty.

Advokat óz úndeýinde tekserý nátıjesi boıynsha aýdıojazbalardyń sany, olarǵa qol jetkizgen tulǵalar, olardyń qoldanylǵan-qoldanylmaǵany jáne qabyldanǵan sharalar týraly aqparat jarııalanýy qajet ekenin atap ótti.

Osy jaǵdaıǵa baılanysty Kazinform tilshisi Іshki ister mınıstrligine suraý joldady.

Resmı aqparatqa súıensek, № 75 mekemede tergeý áreketterin júrgizýge arnalǵan, tehnıkalyq quraldary aýdıojazba júrgizý fýnktsııasymen jabdyqtalǵan jeke kabınetter, sondaı-aq advokattardyń qorǵaýyndaǵy adamdarmen kezdesýlerin ótkizýge arnalǵan, aýdıojazba júrgizilmeıtin arnaıy bólmeler bar.

- Atyraý qalasyndaǵy tergeý ızolıatorynda beınebaqylaý QR qoldanystaǵy zańnamasynyń jáne tergeý ızolıatorlaryndaǵy adamdardy ustaý tártibin, sondaı-aq qorǵaýshymen qupııa qarym-qatynas jasaý quqyǵyn qamtamasyz etýdi reglamentteıtin normatıvtik quqyqtyq aktilerdiń talaptaryna sáıkes júzege asyrylady. Bul rette kúdiktilerdiń, aıyptalýshylardyń jáne sottalýshylardyń qorǵaýshymen kezdesýleri jeke jáne tergeý ızolıatory qyzmetkeri kezdesý qatysýshylaryn kóre alatyn, alaıda olardyń áńgimesin estı almaıtyn jaǵdaılarda ótkiziledi,-dedi Qylmystyq-atqarý júıesi komıteti tóraǵasynyń orynbasary Sergeı Vargo.

Komıetet naqty fakt boıynsha № 75 mekemesinde qyzmettik tekserý júrgizilip jatqanyn málimdedi. Onyń aıasynda ornatylǵan beınebaqylaý kameralarynyń tehnıkalyq sıpattamalary men erekshelikteri, sondaı-aq ózge de mán-jaı zerdelený ústinde.

Osy jaǵdaı boıynsha QR Adam quqyqtary jónindegi Ýákildiń Atyraý oblysy boıynsha ókili Amangeldi Abdolov №75 mekemege 22 qyrkúıekke baryp, kezdesýge arnalǵan 7 kabınetti kórip qaıtqan.

Onyń aıtýynsha, 1 kabınet prokýrordyń, 2 bólme advokattyń, al qalǵan 4 kabınet tergeýshilerdiń aıyptalýshymen nemese kúdiktimen kezdesýine arnalǵan. Mekemeniń bul baǵyttaǵy jumysymen tanysqan ýákil Atyraý oblysy boıynsha Qylmystyq-atqarý júıesi departamentine birqatar usynys jibergen.

- «№75 mekeme» RMM-indegi qoǵamnan ýaqytsha oqshaýlaýdy zańdy negizderde qamtamasyz etetin arnaýly úı-jaılardyń zań talaptaryna sáıkes jasaqtalýyn qamtamasyz etý sharalaryn alýdy, adamdardy arnaýly mekemelerde jáne úı-jaılarda ustaý tártibi men sharttaryn aıqyndaý, olardyń quqyqtaryn, bostandyqtary men zańdy múddelerin qamtamasyz etýdi usyndym, - dep pikir bildirdi Amangeldi Abdolov.

Buǵan deıin Pavlodarda túrmeniń burynǵy qyzmetkerine para alǵany úshin 11,5 mln teńge aıyppul salynǵanyn jazǵan edik.