Advokattardyń táýelsizdik úshin kúres kezeńi bastaldy - Advokattar odaǵynyń tóraǵasy

ASTANA. Jeltoqsannyń 21-i. QazAqparat /Aıdar Ospanalıev/ - «Advokattardyń táýelsizdigin qamtamasyz etý jan-jaqty ári jiti talqylaýdy qajet etedi», deıdi Qazaqstan Respýblıkasynyń Advokattar odaǵynyń tóraǵasy Ánýar Túgel.

Bul týraly ol búgin Parlament Májilisinde «Qazaqstan Respýblıkasyndaǵy advokatýrany damytý» atty taqyrypta ótken halyqaralyq konferentsııa barysynda aıtty, dep habarlaıdy QazAqparat.  

Tóraǵanyń sózine qaraǵanda, elimizdiń 2010-2020 jyldarǵa arnalǵan quqyqtyq saıasat tujyrymdamasynda memlekettiń quqyq qorǵaý ınstıtýttarynyń arasynda advokatýra jetekshi rólge ıe dep kórsetilgen. Sondyqtan da onyń táýelsizdigin qamtamasyz etý jan-jaqty talqylaýdy qajet etip otyr.

Á.Túgeldiń aıtýynsha, Parlament Májilisinde uıymdastyrylǵan konferentsııa advokatýrany damytýdyń kezekti kezeńi. Bul salany damytý osyǵan deıin eki kezeńnen ótti. Onyń biri advokat qyzmettin retteıtin zań kúshine engen kez, ıaǵnı 1997 jyldar bolsa, ekinshi kezeńdi  advokattardyń quzyryn keńeıtetin taǵy bir zań kúshine engen ýaqytpen baılanystyrýǵa bolady. «Búgingi shara advokatýrany damytýdyń úshinshi, ıaǵnı jańa kezeńi. Bul advokattardyń táýelsizdik úshin kúres kezeńi jáne halyqaralyq norma», dedi Advokattar odaǵynyń tóraǵasy.