Advokattardyń qyzmet sapasyn tekseretin tártiptik komıssııa qurylmaq
ASTANA. QazAqparat - Ádilet vıtse-mınıstri Janat Eshmaǵambetov Parlament Senatynyń Konstıtýtsııalyq zańnama, sot júıesi jáne quqyq qorǵaý organdary komıtetine advokattyq qyzmet týraly eki zań jobasy týraly anyqtama berdi, dep habarlaıdy QazAqparat tilshisi.
Vıtse-mınıstr «Advokattyq qyzmet jáne zań kómegi týraly» jáne «QR keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» zań jobalary boıynsha anyqtama berdi. Zań jobalaryn ázirleýdiń maqsaty advokattyq qyzmetti jáne zań kómegin kórsetý júıesin keshendi túrde jetildirý bolyp tabylady. Zań jobalarynyń negizgi erejeleri týraly sóz qozǵaǵan Janat Eshmaǵambetov advokattar sapasyz qyzmet kórsetken jaǵdaıda jaýapkershilikke tartý mehanızmin qaıta qaraý kerektigin atap ótti.
«Qazaqstanda advokattar kórsetetin kásibı qyzmetterdiń sapasyn baqylaý joq. Sońǵy 4 jylda túsken 700-den astam shaǵym zań kómegin kórsetý deńgeıiniń áldeqaıda jaqsartý kerektigin kórsetedi. Jyl saıyn shaǵymdar sany artyp keledi. 2017 jyly shaǵymdar 22 paıyzǵa kóbeıgen», - deıdi ol.
Vıtse-mınıstrdiń aıtýyna qaraǵanda, advokattarǵa túsken shaǵymdardyń kóbeıýi zań kómegin kórsetý sapasynyń tómendigi men jeke jáne zańdy tulǵalardyń ótinishterin obektıvti qaralmaıtyndyǵyn kórsetedi. Shaǵymdardyń basym bóligi advokat kómeginiń sapasynyń tómendigi men advokattardyń aqysyn qaıtarý máselelerine qatysty bolyp otyr.
«Qalǵan shaǵymdar advokattardyń áreketsizdigi, sot tyńdaýlaryna kelmeýi, istiń sheshilýin sozbalańǵa salýy, sondaı-aq, advokattar alqasynyń prezıdıýmy qyzmetine jáne uıymdastyrylýyna baılanysty. Statıstıkaǵa sáıkes, sońǵy jyldary advokattarǵa qatysty shaǵymdardyń 2/3 bóligi qanaǵattandyrýsyz qalǵan», - deıdi vıtse-mınıstr.
Janat Eshmaǵambetov advokattardyń zańnama talaptaryn saqtamaýy, klıent aldyndaǵy mindetterin tıisti deńgeıde oryndamaýy respýblıka advokatýrasynyń ımıdjine jaǵymsyz zalal keltiretinin atap ótti.
«Advokattardyń kásibı ádep normalaryn saqtaý, tártiptik isterdiń shynaıy ári jan-jaqty qaralýyn qamtamasyz etý maqsatynda eki deńgeıli tártiptik komıssııa qurý qarastyrylǵan. Olardyń quramyna 6 advokat, ádilet organdary usynǵan 3 qoǵam ókilderi jáne 2 otstavkadaǵy sýdıa kiredi», - deıdi Janat Eshmaǵambetov.
