Advokattardy taǵaıyndaý tártibi avtomattandyrylýy múmkin
Májilis depýtaty Svetlana Bychkovanyń aıtýynsha, qujat bilikti zań kómegin alý quqyǵyn rettep, advokatýra men zań konsýltanttary ınstıtýtyn odan ary damytýǵa, olardyń qyzmetin avtomattandyryp, ońtaılandyrýǵa baǵyttalǵan.
«Zań jobasy qoldanystaǵy zańnama men quqyq qoldaný praktıkasynyń monıtorıngi, sondaı-aq depýtattardyń advokattarmen, zańgerlermen, sýdıalarmen jáne quqyq qorǵaý organdarynyń ókilderimen kezdesýler kezinde kelip túsken usynystary negizinde ázirlengen. Zań jobasyna sáıkes, qylmystyq, azamattyq jáne ákimshilik quqyq buzýshylyq týraly ister boıynsha memleket kepildik bergen zań kómegin kórsetý sheńberinde advokattardy taǵaıyndaý tártibin avtomattandyrý usynylyp otyr», - dedi ol.
Bul rette qorǵalýshylardyń konstıtýtsııalyq quqyǵy buzylmaýy úshin avtomattandyrýmen qatar advokattardy taǵaıyndaýdyń qoldanystaǵy tártibi saqtalady.
Sonymen qatar, advokattardyń tikeleı biryńǵaı aqparattyq notarıattyq júıeden, sáıkestendirý nómirleriniń ulttyq tiziliminen tek naqty bir is aıasynda elektrondyq, sondaı-aq qaǵaz jetkizgishterde aqparat alýy bóligindegi normalardy bekitý usynylǵan.
Advokattyq qoǵamdastyq úshin ózekti máseleler boıynsha jedel sheshim qabyldaý maqsatynda birqatar jergilikti aktilerdi qabyldaý bóliginde respýblıkalyq konferentsııanyń erekshe quzyretin qysqartý esebinen respýblıkalyq advokattar alqasy tóralqasynyń ókilettigi keńeıtiledi.
Zań jobasyn depýtattar birinshi oqylymda maquldady.
