Advokattardy lıtsenzııalaý jumysyna birshama ózgerister engiziledi - J. Elımanov

Búgin QR Parlamenti Májilisinde «Bilikti zań kómegine quqyq jáne advokatýranyń táýelsizdigi» atty dóńgelek ústel barysynda «QR keıbir zańnamalyq aktilerine advokatýra máseleleri boıynsha ózgerister men tolyqtyrýlar engizý týraly» zań jobasyn tanystyrǵan Ádilet mınıstrligi Tirkeý qyzmeti jáne quqyqtyq kómek kórsetý komıteti tóraǵasynyń orynbasary Janat Elımanov osylaı málim etti.

Mınıstrlik ókiliniń aıtýynsha, atalǵan zań jobasy boıynsha advokattyq qyzmetti lıtsenzııalaý sharasy birshama ózgeriske ushyraıdy. Atap aıtqanda, zań jobasyn ázirleýshi tarap, álgindeı úderiste barynsha ashyqtyqty qamtamasyz etýdi qolǵa almaqshy. Bul negizinen sybaılas jemqorlyqtyń aldyn alýǵa baǵyttalǵan shara retinde qarastyrylyp otyr. «Sonymen qatar, attestatsııalyq komıssııa quramy keńeıtilip, ondaǵy advokattyq qaýymdastyqtar sanyn arttyrý usynylýda. Bunymen qosa, komıssııanyń jumysyna respýblıkalyq advokattar alqasynyń tóraǵasy jetekshilik etedi. Sonymen qatar, álgi komıssııalardyń otyrystaryna beınebaqylaý jasaý men stenogramma júrgizý jáne BAQ-ta jarııalaý sharalary da kútiledi», - deıdi J. Elımanov.

Onyń aıtýynsha, artyq ákimshilik kedergilerdi sylyp tastaý úshin, attestatsııadan ótip, lıtsenzııa alý úshin usynylatyn qujattar tizbesi ońtaılandyrylady.