Advokattar turǵyndardyń talaptaryna sáıkes kelýi tıis - Mámı

ASTANA. QazAqparat - Elordada «Qazaqstan Respýblıkasyndaǵy zańgerlik kásipti retteýdiń ózekti máseleleri» taqyrybynda halyqaralyq konferentsııa ótýde, dep habarlaıdy QazAqparat.

Shara barysynda qatysýshylar elimizdiń Ádilet mınıstrligi ázirlegen «Advokattyq qyzmet jáne zańgerlik kómek týraly», «Advokattyq qyzmet jáne zańgerlik kómek máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobalaryn talqylaýda.

Konferentsııa barysynda sóz sóılegen QR Joǵarǵy sotynyń tóraǵasy Qaırat Mámı Táýelsizdik alǵan ýaqyttan beri respýblıkamyzdyń quqyq salasynda aýqymdy reformalardy júrgizilgenin atap ótti. Sottar jumysy túbegeıli jaqsardy. Sot tóreligi turǵyndar úshin neǵurlym jedel ári qol jetimdi bola tústi. Memleket basshysynyń tapsyrmasyna sáıkes jaryspalylyq qaǵıdatyn kúsheıtýdi jáne advokattardyń quqyqtaryn keńeıtýdi kózdeıtin qylmystyq protsestik zańnamany jańǵyrtý jumystary bastaldy.

«Osynyń barlyǵy halyqaralyq úzdik standarttarǵa sáıkes zań ústemdigin qamtamasyz etý boıynsha quqyqtyq memlekettiń jumysyn jaqsartýǵa baǵyttalǵan» - dedi Joǵarǵy Sot tóraǵasy.

Sonymen qatar ol júrgizilip jatqan reformalar turǵysynan sottarda ókildik etý jáne advokatýra ınstıtýtyn reformalaý týraly máseleniń ózekti ekendigin basa aıtty.

«Advokattar men zańgerler turǵyndardyń talaptaryna shyn máninde sáıkes kelýi tıis jáne quqyqtyq keńistikte azamattardyń zańdy múddeleri men quqyqtaryn tıimdi qorǵaýdy qamtamasyz etýi qajet», - dedi Qaırat Mámı.