Advokattar Svetlana Podobedova, Maııa Maneza men Zýlfııa Chınshanlonyń múddelerin qorǵaýdy jalǵastyrady
ASTANA. QazAqparat - Aýyr atletıka federatsııasy dopıng qoldandy dep aıyptalǵan, 2012 jylǵy Olmıpıada medaldarynan aıyrylǵan qazaqstandyq aýyr atletterdiń quqyqtaryn qorǵaýdy jalǵastyrýda. «Halyqaralyq Olımpıada komıteti dopıng synamada tyıym salynǵan zattar tabylǵan 2012 jylǵy Olımpıada chempıondary - qazaqstandyq aýyr atletterge qatysty qoldanylǵan sanktsııa týraly resmı sheshim shyǵardy.
HOK tártiptik komıssııasynyń sheshimine sáıkes HOK Londonda jazǵy Olımpıadalyq oıyndarda jarysqa qatysqan Svetlana Podobedova, Maııa Maneza, Zýlfııa Chınshanlonyń kórsetken nátıjelerin joqqa shyǵardy. Medal men dıplomdardy qaıtaryp aldy», - delingen AAF habarlamasynda.
QR Aýyr atletıka federatsııasynyń bastamasymen qurylǵan zerthanalyq taldaýlar salasyndaǵy advokattar men mamandar toby budan buryn qazaqstandyq sportshylardyń taldaý nátıjelerin birneshe aı boıy egjeı-tegjeıli zerdeledi. «Alaıda mamandar dopıng synamany qaıta tekserý úrdisinde olqylyq taba almady, sonyń saldarynan qazaqstandyq aýyr atletterdiń olımpıadalyq júldelerin qorǵap qalý múmkin bolmady.
Advokattar toby atletterdiń álemdik jáne qurlyqtyq birinshilikterde ıelengen medaldary men ataqtaryna qatysty múddelerin qorǵaýdy jalǵastyrady, sondaı-aq sportshylardy jarysqa qatysý quqyǵynan aıyrý merzimin jumsartý úshin sharalar qabyldaıdy», - dep atap ótti federatsııadan. Eske salsaq, kórsetilgen máseleler HAAF quzyretine kiredi.
