Advokattar sanyn arttyrýda qandaı kedergi bar

ASTANA. QazAqparat - Advokattar alqasyna kirý úshin múshelik jarna somasy negizsiz joǵary. Bul týraly Astanada «Advokattyq qyzmet jáne zań kómegi týraly» zań jobasyn taltalqylaýǵa arnalǵan dóńgelek ústel otyrysynda QR ÁM Tirkeý qyzmeti jáne zań qyzmetin uıymdastyrý departamenti dırektorynyń orynbasary Gúlshat Bıkenova málim etti, dep habarlaıdy QazAqparat.

«Lıtsenzııa alǵanymen, alaıda advokattar alqasyna kire almaı júrgen zańgerler bizge kelgen bolatyn. Eger de maman alqa quramynda bolmasa, onda ol qorǵaýshy mártebesin almaıdy. Nege? Sebebi bul úshin tólenetin jarnanyń somasy 800 myń teńgege deıin jetedi. Sonymen qatar onyń somasy 1 mln teńge de bolýy múmkin. Tek taǵylymdamadan ótýdiń ózi 280 myń teńgeni qurap otyr», - dedi G. Bıkenova.

Onyń sózine qaraǵanda, búginde 10 myńǵa jýyq lıtsenzııa berilgen, biraq ta olardyń arasynda óz qyzmetimen 4 700 advokat aınalysyp júr. Al qalǵandarynda qorǵaýshy mártebesi joq. Árıne, osy adamdardyń ishinde qyzmettegi sýdıalar men quqyq qorǵaý organdarynyń ókilderi bar ekeni belgili. Sonymen birge, olardyń arasynda advokat bolýǵa nıetti adamdar da az emes, alaıda qarjylyq múmkindigi bul bastamalaryna tusaý bolyp otyr.

Sonymen qatar N. Bıkenova advokattar alqasyna qosylý úshin adamdar qaryz alýǵa májbúr ekenin tilge tıek etti.

«Biz bul salada ádil qadamdar jasalǵanyn qalaımyz, sebebi búginde advokattyq qyzmetterge kóńili tolmaıtyn adamdar bar ekenin bilesizder. Shyn máninde shaǵymdar az emes», - dep túıindedi ol.