Advokattar memlekettik advokatýrany engizýge qarsy

ASTANA. 11 jeltoqsan. QazAqparat - Respýblıkalyq advokattar alqasy elimizde memlekettik advokatýranyń engizilýine qarsy. Bul týraly búgin Parlament Májilisinde «Memleket kepildik bergen bilikti zań kómegin quqyqtyq retteý problemalary» degen taqyryptaǵy konferentsııa barysynda Respýblıkalyq advokattar alqasynyń tóraǵasy Ánýar Túgel málim etti.

Sóz arasynda Parlament qabyrǵasynda «Memleketpen kepildendirilgen zańgerlik kómek týraly» zań jobasy talqylanyp jatqanyna toqtalǵan alqa tóraǵasy, buǵan qatysty birqatar usynystardyń bar ekenin de alǵa tartty. «Meniń áriptesterim tarapynan zań jobasynyń birqatar erejelerine qatysty másele kóterilip júr. Bul respýblıkamyzda memelkettik advokatýranyń engizilýine qatysty bolyp tabylady. Bizdiń oıymyzsha, memlekettik advokatýra jalpy advokatýranyń basty qaǵıdatyna - onyń táýelsizdigine tikeleı qarsy keledi. Tipti memleket pen advokatýra - bul óziniń tabıǵatynan ekeýi eki baǵyt ustanatyndyǵy týraly qarapaıym faktini aıtpaı-aq qoıalyq. Óıtkeni, advokatýra azamattyq qoǵam ınstıtýty, tulǵanyń zańdy quqyǵy men bostandyǵyn qorǵaýda memlekettiń qarsylasy bolýy tıis», - dedi Ánýar Túgel. Onyń aıtýyna qaraǵanda, memleket atynan bir tulǵa bir ýaqytta ózi aıyptaýshy da ózi aqtaýshy da bola almaıdy. «Budan bólek, atalǵan ereje ózine eshqandaı da quqyqtyq júkteme almaıdy jáne onyń qandaı retteýshi fýnktsııany atqaratyny da belgisiz qalyp otyr», - dedi alqa tóraǵasy.