Advokattar alqalary odaǵy qurylatyn boldy
ASTANA. 7 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine advokatýra máseleleri boıynsha ózgerister men tolyqtyrýlar engizý týraly» zań jobasy ekinshi oqylymda talqylanyp, qabyldandy.
Qujat Memleket basshysynyń qol qoıýyna jiberiledi.
Parlament qabyldaǵan qujat halyqqa bilikti zań kómegin tıisinshe kórsetýdi qamtamasyz etýge, sondaı-aq onyń sapasyn baqylaý tetikterin belgileýge baǵyttalady. Osyǵan oraı, zań jobasy attestattaý komıssııasynyń qyzmetin jáne advokattyq qyzmetpen aınalysýǵa úmitker adamdardyń taǵylymdamadan ótý protsesin retteý sharalary kózdeledi. Advokattar úshin uzaqtyǵy 6 aıdan 1 jylǵa deıin belgilengen taǵylymdamadan ótý merzimin ulǵaıtý qarastyrylady. Budan bólek, advokattardy tártiptik jaýaptylyqqa tartý tártibi, onyń tizbesi aıqyndalady.
Májilistiń maquldaýynan ótken qujatqa Parlament Senaty birqatar ózgerister engizdi. Atap aıtqanda, zań jobasy boıynsha Advokattar alqalary odaǵyn qurý tártibi men onyń quzyreti kózdeledi. Alaıda osyndaı alqanyń qurylýy zań jobasynyń advokattar qyzmetiniń tıimdiligin arttyrý jáne onyń sapasyn baqylaý tetikterin belgileý jónindegi maqsatyna qol jetkizýdi qamtamasyz etpeıdi. Odaqtyń uıymdyq-quqyqtyq nysanyn ózgertý usynylady. Bul rette oǵan barlyq advokattar alqalarynyń mindetti músheligi kózdeledi. Jańa uıymdyq-quqyqtyq nysandy zańnamalyq reglamentteý maqsatynda Respýblıkalyq advokattar alqasyn qurý tártibin, qyzmetiniń quqyqtyq negizderin, onyń ókilettikterin, negizgi maqsattary men mindetterin, sondaı-aq onyń organdary men múlkin qalyptastyrý máselelerin aıqyndaý usynylady.
