Advokattar alqa bılerdi sot isine kóptep qatystyrýdy usyndy

ASTANA. QazAqparat - Qazaqstandaǵy advokattar qaýymy asa aýyr qylmystardyń barlyq túrine qatysty sot isine alqa bıler sotyn qatystyrýdy usynady. Bul týraly Astanada «Qazaqstandaǵy qylmystyq protsesterdi jańǵyrtýdyń ózekti máseleleri» taqyrybynda ótken dóńgelek ústelde Almatydaǵy advokattar alqasynyń múshesi Danııar Qanafın málim etti, dep habarlaıdy «QazAqparat» HAA tilshisi.

Eske sala ketsek, elimizde qazirgi tańda advokatýraǵa qatysty zań jobasy talqylanyp, ol Parlament Májilisine joldanǵan. Jańa zań jobasy advokatýra salasynda birqatar ózgeristerdi engizýdi kózdep otyr.

«Bizdiń elimizde sot isine alqa bılerdiń qatysýy qylmystyq quramnyń bes jaǵdaıynda ǵana belgilengen. Qatelespesem, jasósipirimderdi saýdalaýǵa qatysty isti osy qatarǵa jatqyzýǵa bolady. Al ol mazmundaǵy ister bizde kóp kezdespeıdi. Demek, is júzinde bizde alqa bılerdiń sot isine aralasý jaǵdaıy tym az. Olardyń qatysýymen jylyna bar-joǵy birneshe is qana qaralady. Bul óte az. Alqa bıler soty óte progressıvti sot. Ol azamattarǵa elde ádil sot ornatýǵa septigin tıgizedi», - deıdi Danııar Qanafın.

Advokattyń aıtýynsha, alqa bıler sotynyń sot isine aralasý jaǵdaıy qylmystyq belgili bir túrlerimen shektelip qalmaýy kerek.

«Birneshe márte respýblıkalyq advokattar alqasymen usynylǵan ustanymdar mynadaı: barlyq asa aýyr qylmystar boıynsha alqa bıler sotynyń músheligin keńeıtý, belgili bir tar aıada shektelip qalmaý. ıAǵnı, advokatýradaǵy bul qadam qylmystyq turǵyda ádil sotty izgilendirip, ony damytýǵa septigin tıgizer edi. Jylyna shamamen barlyq respýblıka boıynsha alqa bıler sotynyń qatysýymen sotta qylmystyq ister qaralady», - deıdi Danııar Qanafın.

Almatydaǵy advokattar alqasynyń múshesi, belgili bir qylmystyq is júrgizilgen kezde bireýdiń telefonyn tyńdaý nemese úıdi, keńseni tintý kezinde tergeý toby azamattardyń jeke ómirine bas suǵatyndyǵyn aıtty.

«Adamnyń Konstıtýtsııa boıynsha quqyǵy shekteledi. Bul jaǵdaıda úıdi tintýge nemese telefondy tyńdaýǵa quqyq qorǵaý organynan táýelsiz vedomstvo ruqsat berýi kerek. Demokratııalyq-quqyqtyq memlekette mundaı rusqatty memlekettiń táýelsiz tarmaǵy retindegi sot beredi. Sondyqtan, sottardyń quziretteriniń artýy (jańa zań jobasynda - avt.) oń qadam bolyp tabylady. Ol adam quqyǵynyń qorǵalýynda senimdi kepildik bere alady. Qazirgi ýaqytta bul ruqsatty bizdiń elde prokýratýra beredi. Prokýratýra ózińiz biletindeı sotta memlekettik aıyptaý jaǵyndaǵy qýdalaý organy. Álemdik tájirıbede dál osy baǵyttaǵy áreketterge sanktsııa beretin sot - taptyrmas sýbekt bolyp tabylatynyn aıtyp ótkim keledi», - deıdi Danııar Qanafın.