Advokat Súleımenov Golovkınniń aǵasynyń qaryzyn tóleýge daıyn

«Bizdiń batyrymyz Gennadıı Golovkınniń aǵasy Maksım Golovkınge qatysty sot kólik quraldary úshin salyq retinde 21 338 teńge kóleminde óndirý týraly sheshim shyǵardy. Jýrnalıster Maksımge kólik júrgizýge tyıym salynýy múmkin ekenin jazýda. Bul qate aqparat, qaryz 20 AEK - 41 000 teńgeden asqanda ǵana tyıym salynady. Qıyndyqtar týyndamaý úshin onyń qaryzyn ózim de tóleı alamyn, tek avtokóliktiń VIN kodyn bilý qajet. Qaryzdy egov.kz arqyly tóleýge bolady. Maksımdy tanıtyn jan bolsa, VIN kodyn bilip berýdi suraımyn, qaryzdy da ózim tóleımin», - dep jazdy advokat óziniń feısbýktegi paraqshasyna.

Maksım Gennadııdiń syńary. Olar bala kezden barlyǵyn birge jasaıdy. Bir synypta oqydy, boks úıirmesine jazyldy, bir salmaq dárejesinde rıngke shyqty. Maksım de jaman boksshy bolǵan joq - bir kezderi Qazaqstannyń chempıony atanǵan. 2004 jylǵy Olımpıadaǵa irikteý kezinde baýyryna qarsy judyryqtasýdan bas tartty. Sporttyq karerasy aıaqtalǵan soń Maksım Golovkın bapker boldy. Qazir Gennadııdiń komandasynda jumys isteıdi.