Advokat Perızat Qaırat pen onyń anasyn aqtaýdy talap etip, sotqa shaǵym túsirdi

ASTANA. KAZINFORM – Búginde taratylǵan Biz birgemiz qaıyrymdylyq qorynyń burynǵy jetekshisi Perızat Qaırattyń advokaty sot úkimine apellıatsııalyq shaǵym túsirdi. Bul týraly elorda sotynyń baspasóz qyzmeti habarlaıdy. 

– Shaǵym tústi. Apellıatsııalyq shaǵym túsken kezde sýdıa onyń durys toltyrylýyn jáne berilý merzimin tekseredi. Eger shaǵym Qylmystyq-protsestik kodekstiń talaptaryna saı bolsa, zańda belgilengen merzimde isti Astana qalasynyń sotyna joldaıdy, - degen habar aldyq qalalyq sottan. 

Sondaı-aq aqparatta is apellıatsııaǵa túsip, óndiriske qabyldanǵan jaǵdaıda qosymsha habar beriletini aıtylǵan. 

– 8 tamyzda apellıatsııalyq shaǵym túsirdim. Onda birinshi satydaǵy sottyń úkimin joıyp, qylmystyq quramnyń bolmaýyna baılanysty aqtaýdy suradym, - deıdi advokat Aslanbek Dáýletııarov.

Eske salaıyq, elorda soty Perızat Qaıratqa 10 jyl, anasy Ǵaını Alashbaevaǵa 7 jylǵa úkim shyǵarǵan edi. 

Artynsha Perızat Qaırat pen onyń anasynyń advokaty Aslanbek Dáýletııarov úkimdi zańsyz dep tanyp, appelıatsııalyq tártippen daýlaıtynyn málim etti. 

Sondaı-aq sot úkimimen Perızat Qaırat jábirlenýshilerdiń shyǵynyn óteýge mindetteldi.