Advokat pen prokýrordyń teńdigi: Prezıdent tapsyrmasy qalaı oryndalyp jatyr

NUR-SULTAN. QazAqparat – Ádilet mınıstrligi zańnama departamentiniń dırektory Baqtygúl Ataǵazıeva Prezıdenttiń advokat pen prokýrordyń teńdigin qamtamasyz etý baǵytyndaǵy tapsyrmasy qalaı oryndalyp jatqanyn aıtyp berdi, dep habarlaıdy QazAqparat tilshisi.

«Memleket basshysy «Jańa jaǵdaıdaǵy Qazaqstan: is-qımyl kezeńi» atty Joldaýynda sottyń básekege qabiletti, al sýdıanyń aıyptaý tarapynan táýelsiz bolýy kerektigin jáne ol úshin advokat pen prokýrordyń teńdigin qamtamasyz etý qajettigin atap ótken bolatyn. Múddeli memlekettik organdar advokattyq qaýymdastyqpen birlesip ázirlegen túzetýler Bas prokýratýranyń qylmystyq protseste azamattardyń quqyqtaryn qorǵaýdy kúsheıtý boıynsha jáne Májilis depýtattarynyń bastamasymen ázirlengen advokattyq qyzmet jáne zań kómegi máseleleri týraly zań jobalarynda kórinis tapty», - dedi Baqtygúl Ataǵazıeva Ádilet mınıstrliginiń onlaın rejımdegi alqa májilisinde.

Onyń aıtýynsha, búginde zań jobalary Parlament Májilisiniń qaraýynda.

«Mysaly advokat iske kirisken sátten bastap qylmystyq isti qozǵaýǵa negiz bolǵan ustap alý, qaraý, tintý hattamalary, mamandar men saraptamalardyń qorytyndylary jáne ózge de protsestik qujattardyń naqty tizimimen tanysýǵa múmkindik beretin túzetýler kózdelgen. Bul túzetýler qabyldanǵan jaǵdaıda advokattar qorǵaý baǵytyn tıimdi qurýǵa múmkindik alady. Óz kezeginde advokattar tarapynan teris paıdalanýdyń yqtımal faktilerin boldyrmaý maqsatynda olardyń ókilettikterin keńeıtý sheńberinde, bizdiń oıymyzsha, jergilikti tártiptik komıssııalar jazadan qutylmaýshylyq qaǵıdatyn saqtaýǵa basa nazar aýdara otyryp, óz jumysyn túbegeıli qaıta qaraýy qajet. Advokattar mártebesin arttyrý turǵysynan Respýblıkalyq advokattar alqasynyń rólin kúsheıtý de mańyzdy», - deıdi ol.

Baqtygúl Ataǵazıeva qazirgi tańda respýblıkalyq advokattar alqasynyń tikeleı ókilettigi joq, barlyq sheshimderdi onyń tóralqasy qabyldaıtynyn jetkizdi.

«Osyǵan oraı tóralqanyń alqalar qyzmetin úılestirý, advokattardyń kásiptik deńgeıin kóterý, alqalardy ádistemelik, aqparattyq qamtamasyz etý, tártiptik praktıkany qorytý jáne basqa ókilettikterin Respýblıkalyq advokattar alqasyna berý oryndy bolyp kórinedi. Usynylyp otyrǵan sharalar elimizdegi advokatýranyń damýyna oń áserin tıgizedi dep oılaımyz», - dedi ol.