Advokat pen prokýror mártebesin teńestirý qajet – Aıdyn Bıkebaev
«Prokýror men advokattyń teńdigin qamtamasyz etý úshin birqatar zańnamalyq, uıymdastyrýshylyq is-shara qajet. Qarapaıym tilmen aıtar bolsaq, Konstıtýtsııaǵa advokat kirmegen. Prokýror týraly zań – konstıtýtsııalyq, mártebesi joǵary. Kelesi másele – qarjylandyrý. Prorkýratýrany kútip-ustaý jaqsy. Kóptegen qylmystyq iste memleket tegin advokat usynatynyn bilesizder. Olarǵa memleket tóleıdi. Eger barlyq advokatqa jylyna bólinetin 2,7 mlrd teńge bıýdjet qarajatyn eseptesek, aıyna 80 myń teńgeden keledi. Bul prokýrordyń jalaqysynan tómen ekendigi belgili. Munyń ústine atalǵan somany alý úshin advokat tergeýshiniń qoly qoıylǵan qaýly alýǵa tıis. Al bul advokatty yntalandyrmaıdy», - dedi ol Bas prokýratýrada ótken Memlekettik aıyptaýshylar forýmy aıasynda BAQ ókilderine bergen suhbatynda.
Onyń atap ótýinshe, elimizde «Advokattyń qyzmetine kedergi keltirý» baby jumys istemeıdi. Máselen, 30 jyldyń ishinde advokat qyzmetine kedergi keltirgeni úshin shyǵarylǵan úkim bolmaǵan.
Sonymen qatar ol BAQ ókilderiniń respýblıkada aqtaý úkimin alý múmkindiginiń tómendigine qatysty saýalyna jaýap berdi.
«Bul ózara baılanysty problema shyǵar. Advokat mártebesi álsiz jáne sot júıesine reforma qajet. Naqty sýdıaǵa yqpal etýge múmkindik beretin belgili bir tetikter bar. Ótken jyldyń qyrkúıeginde Prezıdent sýdıalardyń joǵary turǵan alqaǵa táýeldiligin joıý týraly tapsyrma berdi. Tapsyrma dál osylaı boldy. Senat zań qabyldady. Bizdiń paıymyzsha, bul problemany jetkilikti sheshe alǵan joq. Qazirgi ýaqytta Senatta jańa jumys toby quryldy. Táýeldilik týdyratyn barlyq jaıtty alyp tastaıtyn tetikter usynýǵa tyrysýdamyz. Ázirshe bul joabalar talqylaý deńgeıinde tur», - dedi ol.
