Advokat pen prokýror quqyǵyn teńestirý: Prezıdent tapsyrmasy qalaı oryndalyp jatyr

NUR-SULTAN. QazAqparat – Ádilet mınıstri Marat Beketaev advokattar men prokýrorlardyń quqyǵyn teńestirý jónindegi Prezıdent tapsyrmasy qalaı oryndalyp jatqanyn aıtyp berdi, dep habarlaıdy QazAqparat tilshisi.

«Memleket basshysy «Jańa jaǵdaıdaǵy Qazaqstan: is-qımyl kezeńi» Joldaýynda memlekettik basqarý, densaýlyq saqtaý, bilim, áleýmettik ekonomıkalyq salalardaǵy jáne basqa da suraqtar boıynsha birqatar máselelerdi sheshý qajettigi týraly atap ótti. Prezıdent pandemııa tájirıbesin eskere otyryp, quqyqtyq reglamentteý deńgeıleriniń arasyndaǵy teńgerimdi qamtamasyz etýge baǵyttalǵan tetikterdi ázirleýdi tapsyrdy. Prezıdent atqarýshy bılik qyzmetiniń shekten tys zańnamalyq reglamenttelýi týyndaǵan máselelerge shuǵyl den qoıýǵa kedergi keltirgenin aıtty», - dedi Marat Beketaev OKQ-da ótken baspasóz máslıhatynda.

Mınıstr atap ótkendeı, Prezıdent bul máseleni Quqyqtyq saıasat tujyrymdamasy aıasynda qarastyrýdy tapsyrǵan. Osy rette tolyq normalardy anyqtaý úshin zańnamalyq aktilerge tekseris júrgizilmek.

«Memleket basshysy sot protsesterinde advokat pen prokýror quqyqtarynyń teńdigin qamtamasyz etý qajettigin jeke atap ótti. Atalǵan tapsyrmany oryndaý úshin advokattyq qoǵamdastyqpen birlesip «Advokattyq qyzmet jáne zań kómegi máseleleri jónindegi» zań jobasyna engizilgen túzetýler ázirlendi. Bul túzetýler advokattardyń sot protsesterindegi ókilettikterin keńeıtedi. Zań jobasy Májilistiń qaraýynda. Ádilet mınıstrligi, sonymen qatar, 43 is-shara boıynsha birlesip oryndaýshy bolyp belgilengenin atap ótý kerek. Іs-sharalardy iske asyrý barysynda biz jaýapty memlekettik organdarǵa jan-jaqty quqyqtyq qoldaý kórsetemiz, sondaı-aq, tıisti usynystar ázirleýge qatysamyz», - dedi mınıstr.