Advokat Quspan: Quqyq qorǵaý organdarynyń halyqpen birlese jumys isteýiniń tıimdiligin kórdik
«Jergilikti prokýratýra organdary qyzmetindegi jaǵymdy tájirıbeler týraly atap ótpekpin. Birqatar óńirde prokýratýra jáne basqa da quqyq qorǵaý organdarynyń halyqpen birlese jumys isteýiniń tıimdi nátıjesin de kórdik. Olardyń bul qyzmetteri basqa óńirler úshin jáne bolashaqta osyndaı jaǵdaılardy boldyrmaý, aldyn-alý úshin óte qajet, sol sebepti arnaıy zertteýdi qajet etetini de sózsiz. Mysaly, komıssııa Shymkent qalasy prokýrorynyń is-qımyldaryna joǵary baǵa beredi», - dedi A. Quspan.
Osy oraıda ol prokýratýra qalalyq sot tóraǵasymen kelise otyryp, Polıtsııa departamenti jáne aýdandyq basqarmalarynda prokýratýra qyzmetkerleriniń qatysýymen kóshpeli ákimshilik jáne tergeý sottarynyń otyrystaryn uıymdastyrǵanyn aıtty.
«Nátıjesinde, ótinishhattardyń sotpen jedel qaralýyna jáne qylmystyq istiń sozbalańǵa salynýyna jol berilmedi. Jalpy ishki ister organdaryna 3521 adam jetkizilip, onyń ishinde qylmysqa qatysy bar dep 90 adam qamaýǵa alynǵan, 503-i ákimshilik jaýapqa tartylǵan. Qalǵan 2891 adammen profılaktıkalyq áńgime júrgizilip, olar kúdikti dep tanylmaı turyp bosatylǵan. Jáne bir nazar aýdaratyn sát, qala prokýrory jetkizilgen jáne ustalǵan azamattardyń týystary men qoǵam belsendilerin jeke qabyldaý júrgizý arqyly qylmystyq is pen oryndalǵan tergeý áreketteri, olardyń quqyqtary, ustalǵandardyń jaı-kúıi jóninde túsindirý jumystaryn ashyq júrgizip kelgen. Onyń birine bizdiń komıssııa tolyq quramda qatystyq. Sonyń nátıjesinde, terrorızm aktisi boıynsha (QK-tiń 255-baby) saralanǵan 19 kúdiktiniń áreketi jappaı tártipsizdikke (QK-tiń 272-baby) qaıta saralandy. Qamaý túrindegi bultartpaý sharasy qoldanylǵan 90 kúdiktiniń 44-i ne qatysty qoldanylǵan bultartpaý sharasy ózgertildi. Árıne, bul baǵyttaǵy birlesken jumystarymyz jalǵasyn tabatyn bolady», - dedi A. Quspan.
