Advokat egiz balasyn óltirgen qylmyskerdiń jubaıyna jazany jeńildetýdi surady
ALMATY. QazAqparat - Egiz balanyń anasy Alla Volchenkonyń advokaty áıeldiń jazasyn jeńildetýge kúsh salmaq. Bul týraly búgin sot otyrysy barysynda qorǵaýshy Farhad Taıpov aıtty, dep habarlaıdy QazAqparat tilshisi.
«Meniń oıymsha ol balalardy óltirýge qatysqan joq. Búgin sotta onyń jospardy bilgeni jáne polıtsııaǵa aıtpaǵany talqylanyp jatyr. Ony kúıeýi únemi ishkizip otyrǵan. Fızıkalyq turǵydan ol kete almady. Al, Samal shaǵyn aýdanynda balasyn tastap ketý sebebi, áıel osylaısha balasyn aman alyp qalǵysy kelgen», - dedi Farhad Taıpov.
Qorǵaýshynyń aıtýynsha, mundaı qylmys úshin Volchenko 15 jylǵa bas bostandyǵynan aırylýy múmkin. Al balalardyń ákesi Emıl Gılmýtdınov 18 jyldan asa merzimge sottalmaq.
Eske sala ketsek, 11 qyrkúıek kúni jantúrshigerlik oqıǵa Túrkisib aýdanynda bolǵan. Kóppáterli úılerdiń birinde tońazytqyshtyń ishinen sábılerdiń múrdesi tabylǵan. Sol kúni Medeý aýdanynda adasyp júrgen eki jastaǵy er bala polıtsııaǵa jetkizildi. Bala ólgen egizderdiń aǵasy ekeni anyqtaldy. Egizderdiń ólimine kúdikti retinde olardyń ata-anasy ustaldy. Qazirgi ýaqytta sot aldynda Qazaqstan azamatshasy Alla Volchenkomen onyń azamattyq nekedegi Ózbekstan azamaty Emıl Gılmýtdınov jaýap berýde. Olarǵa qatysty QR QK 99-babynyń 2-bólimi, 1,3,7- tarmaqtary (kisi óltirý) jáne 119-baptyń 1-bólimi (qaraýsyz qaldyrý) boıynsha is qozǵalǵan.
