Advokat Býrhan Janseıitov qarjylyq monıtorıng agenttigi qyzmetkerine qol kótergen

NUR-SULTAN. QazAqparat – Advokat Býrhan Janseıitov quqyq qorǵaý organdarynyń jumysyna kedergi keltirip, arandatý áreketin uıymdastyrý kezinde qarjylyq monıtorıng agenttiginiń qyzmetkerine qol kótergen. Bul týraly agenttiktiń baspasóz qyzmeti málim etti, dep habarlaıdy QazAqparat tilshisi.

«Keshe Qarjylyq monıtorıng agenttigi reıderlik basyp alýmen aınalysqan adamdar tobyna qatysty tergeý nátıjelerin jarııalady. 12 shildede osy toptyń múddesin qorǵaǵan advokat Býrhan Janseıitov kúdiktilerge jasyryn baqylaý júrgiziletini týraly aqparat alyp, quqyq qorǵaý organynyń qyzmetkerlerine kedergi keltirdi.

Atap aıtqanda, ol maqsatty túrde arańdatý áreketin uıymdastyrdy. B. Janseıitov jedel toptyń qyzmettik kóligine tosqaýyl bolyp, avtokóliktiń aldynǵy dóńgelegin tesip, terezesin syndyrmaq boldy. Ol maqsatty túrde qyzmetkerlermen janjal týyndatýǵa tyrysty.

Býrhan Janseıitov oqıǵa ornyna kelgen polıtsııa qyzmetkerleriniń talaptaryna jaýap bermedi, agressııa tanytty. Sondaı-aq, ol Qarjylyq monıtorıng agenttiginiń qyzmetkerine qol kóterdi.

B. Janseıitov atalǵan oqıǵany tergeýge kedergi jasaý jáne jalǵan qoǵamdyq pikir qalyptastyrý maqsatynda uıymdastyrdy. Onyń jasaǵan áreketteri bılik organdary men qoǵamdyq tártipke qarama-qaıshy dep tanylyp, B. Janseıitov qamaýǵa alyndy» - delingen Qarjylyq monıtorıng agenttiginiń habarlamasynda.

Sonymen qatar, B. Janseıitov ózge de advokattarǵa olardyń syrtynan quqyq qorǵaý qyzmetkerleri andyp júrgeni týraly aqparat taratqan. Qarjylyq monıtorıng agenttigi bul aqparattyń shyndyqqa janaspaıtynyn málimdedi.

Eske sala ketıik, bul ýaqytqa deıin advokat Býrhan Janseıitov quqyq qorǵaý organdarynyń qyzmetine kedergi keltirgeni úshin qamaýǵa alynǵanyn jazǵan edik.