Advokat Aıman Ýmarova ózine til tıgizgen prokýrordy sotqa bermek
Aıman Ýmarovaǵa ózine durys jaýap bermegen prokýratýra ókilderi habarlasyp, kezdesýge shaqyrǵan.
«Menimen bir adam baılanysqa shyqty. Prokýratýra ókilimin dedi. Kezdesýge shaqyrdy. Biraq men kezdesýden bas tarttym. Maǵan ol kezdesýdiń endi qajeti joq. Mundaı mazaq jaýapty alǵanyma 15 kún ótti. Osy ýaqytta tym bolmasa bir ret habarlasyp, qatelesip jiberdik aıtatyn shyǵar dep oıladym. Sizderdiń qońyraýlaryńyzǵa jaýap bermeıdi, árıne. Olar ne aıtady? Búkil prokýratýranyń bet-beınesin kórsete me?», - dedi Aıman Ýmarova.
Advokat bul mazaqty beı-jaı qaldyra almaıtynyn aıtty. Ol endi ózin qaralaǵandardy sotqa bermek.
«Mundaı mazaqtan soń ne sezinýge bolady? Sotqa beremin. Bul resmı jaýap elektrondy qoltańbamen bekitilgen. Jaýapty klıentke qalaı kórseterimdi bilmedim. Ol áıel eki jyl boıy balasynyń ólimine kinálilerdi taba almaı jatyr. Bul iste dárigerler kináli bolýy múmkin. Al, olar maǵan osylaı jaýap qaıtarady. Bul jaýapty men 6 aı buryn alǵanmyn. Biraq «Pýpkına Zalýpkınasyz».... Bul jaqsy sóz emes ekenin túsinemin. Biraq dál osyndaı maǵyna beretinin bilgende sumdyq boldym», - dedi zańger.
Aıta ketsek, munyń aldynda belgili quqyq qorǵaýshy Aıman Ýmarova kóp ýaqyttan beri qyzynyń ólimine aıyptylardy taba almaı kele jatqan áıeldiń isi boıynsha prokýratýraǵa saýal joldaǵan. Bostandyq aýdandyq prokýratýrasy Elektrondy úkimet portaly arqyly «Qurmetti, Pýpkına Zalýpkına!» dep resmı jaýap qaıtarǵan.
