Adolf Gıtler týǵan úıde polıtsııa bólimshesi ashylady

ASTANA. KAZINFORM — Aýstrııada Adolf Gıtler dúnıege kelgen úıdiń bolashaǵyna qatysty ondaǵan jylǵa sozylǵan pikirtalas aıaqtaldy. Endi bul ǵımaratta polıtsııa bólimshesi ornalasady, dep habarlaıdy BILD.

AFP agenttiginiń habarlaýynsha, qurylys jumystary aıaqtalýǵa jaqyn. 2026 jyldyń ekinshi toqsanynda munda polıtsııa jumysyn bastaýy josparlanyp otyr.

Gıtlerdiń otbasy 1889 jyly bul úıdiń ekinshi qabatyndaǵy jaldamaly páterde turǵan. Kóp uzamaı olar Aýstrııanyń Braýnaý-am-Inn qalasynan Bavarııadaǵy Passaý qalasyna kóship ketken. XVII ǵasyrda salynǵan ǵımarat bastapqyda qala turǵynynyń úıi bolsa, keıin Gasthof zum Pommer atty traktırge aınalǵan.

Úshinshi reıh kezeńinde ulttyq-sotsıalıster «fıýrerdiń týǵan úıin» nasıhat quraly retinde paıdalanǵan. Ekinshi dúnıejúzilik soǵystan keıin ǵımarat Pommer áýletiniń menshiginde qaldy, al 1972 jyly ony Aýstrııanyń Іshki ister mınıstrligi jalǵa aldy. Munda qalalyq kitaphana, mektep, keıin múmkindigi shekteýli jandarǵa arnalǵan sheberhana ornalasqan.

2016 jyly tarıhı nysanǵa qatysty ońtaıly sheshim qabyldaý úshin arnaıy komıssııa quryldy.

Kópshilik memorıal ashýdy usynǵanymen, bılik bul ıdeıadan bas tartty, óıtkeni ǵımarat neonatsısterdiń jınalatyn ornyna aınalyp ketýi múmkin degen qaýip boldy.

Aqyrynda Aýstrııa parlamenti nysandy memleket menshigine alý týraly zań qabyldady. Iesine shamamen 810 myń eýro ótemaqy tólendi. Qaıta qurý jumystaryna shamamen 20 mln eýro jumsalady. Úkimettiń maqsaty — bul oryndy «beıtaraptandyrý». Munda polıtsııa bólimshesimen qatar adam quqyqtary boıynsha oqý ortalyǵy da ashylady.

Aýstrııa Іshki ister mınıstrligi bul sheshimdi Germanııanyń Bavarııa aımaǵyndaǵy tájirıbemen baılanystyrady: Mıýnhendegi Prıntsregentenplatstaǵy Adolf Gıtlerdiń burynǵy páterinde 1949 jyldan beri Bavarııa polıtsııasynyń túrli bólimsheleri ornalasqan.

Aıta ketelik «Tıtanıkte» qaza tapqan jolaýshynyń saǵaty aýktsıonda 2,3 mln dollarǵa satylǵan edi.