Sátqalıev AES alańdary týraly: Shyǵysta — Kýrchatov, batysta MAEK bolmaýy da múmkin

ASTANA. KAZINFORM — Atom energetıkasy jónindegi agenttiginiń tóraǵasy Almasadam Sátqalıev elimizde salynýy múmkin AES-terdiń orny týraly pikir bildirdi. 

— Buǵan deıin aıtqanymyzdaı, Qazaqstanda AES salýǵa óte qolaıly birneshe alań bar. Bul — eldiń soltústik-shyǵysy, batysy jáne ońtústigi. Shyǵysta Kýrchatov, Batys qazaqstanda áli alań anyqtalǵan joq. Tıisti zertteýler júrgiziledi. Mańǵystaý atom energetıkalyq kombınatynyń aýmaǵy bola ma, bas alań bola ma, ony tıisti zertteýler anyqtaıdy. Men ony aıta almaımyn. Óıtkeni ereje boıynsha úsh alań tańdalady da ony vender anyqtaıdy, — dedi ol.

Agenttik basshysy alań tańdaý kezinde ekologııalyq zertteýlerge basa kóńil bólinetinin aıtady.

— Bul ózi osyndaı standartty tájirıbe. Injınırıngpen aınalysatyn, ǵylymı zertteýmen aınalysatyn kompanııalardy jaldap, olar ekologııalyq zertteýler jasaıdy, jergilikti orynnyń ekologııalyq talaptarǵa qanshalyq sáıkes ekenin tekseredi. Osy alańdardyń ishinen eń tıimdi degeni irikteledi. Álemde osyndaı jalpyǵa ortaq tájirıbe bar, — dedi Almasadam Sátqalıev.

Buǵan deıin «Qazaqstan atom elektr stantsııalary» JShS bas dırektorynyń orynbasary Rınat Oqasov Qazaqstanda alǵashqy AES salýmen aınalysatyn konsortsıým qurý jumystary qandaı satyǵa jetkenin baıandaǵan bolatyn.