Memleket basshysy: Ádiletti memleket retinde ár azamattyń usynysyn eskerýimiz kerek
ASTANA. KAZINFORM – Prezıdent Parlamenttik reforma jónindegi Jumys tobynyń birinshi otyrysyn qorytyndylap, Parlament – Táýelsizdigimizdi jáne memlekettigimizdi aıshyqtaıtyn mańyzdy qurylym ekenin aıtty. Bul týraly Aqordanyń baspasóz qyzmeti habarlady.
Ata zańǵa engiziletin árbir ózgeris muqııat pysyqtalyp, daıyndalýǵa tıis ekenin atap ótti.
– Parlament – Táýelsizdigimizdi jáne memlekettigimizdi aıshyqtaıtyn mańyzdy qurylym. Bul eshqashan ózgermeıtin aqıqat, aldaǵy ýaqytta da solaı bolyp qala beredi. Jalpy, reformanyń negizgi maqsaty, soǵan sáıkes istelýge tıis jumystyń baǵyt-baǵdary týraly Joldaýda keńinen aıtyldy. Referendýmǵa deıin atqarylatyn jumystyń bárin muqııat oılastyryp, baıyppen júrgizý qajet. Bilikti mamandar óz oılaryn ashyq aıtyp, tıimdi usynystar berýi kerek dep sanaımyn. Túpkilikti sheshim, ıaǵnı qoǵam pikiri durys bolýy úshin osy máselege qatysty aıtylatyn árbir oı-pikir de ábden tekserilgen, ekshelgen, jan-jaqty saraptalǵan bolýy kerek. Bul – óte mańyzdy másele. Sondyqtan Jumys toby óz mindetin naǵyz kásibı ustanymǵa saı atqarýǵa tıis. Atap aıtqanda, «e-Otinish» jáne «e-Gov» portaldary arqyly kelip túsken barlyq oı-pikirdi saraptap, zerdeleý qajet. Biz Ádiletti memleket retinde ár azamattyń ortaq iske paıdaly bolatyn usynysyn eskerýimiz kerek. Ata zańǵa engiziletin árbir ózgeris muqııat pysyqtalyp, daıyndalýǵa tıis. Ár baptyń, ár normanyń mán-maǵynasyna tereń boılaǵan jón, ıaǵnı quqyqtyq, protsedýralyq máselelerdi naqty aıqyndap alýymyz qajet. Budan bólek, basqa da kóptegen másele paıda bolýy múmkin. Qysqasy, aldymyzda turǵan sharýa óte aýqymdy. Jumys tobyna úlken senim artylyp otyr. Іsterińizge sáttilik, tabys tileımin! - dedi Memleket basshysy.
Jıyndy Jumys tobynyń jetekshisi, QR Memlekettik keńesshisi Erlan Qarın júrgizdi. Sonymen qatar zań ǵylymdarynyń doktory Vıktor Malınovskıı, Parlament Májilisiniń depýtattary Únzıla Shapaq, Aıdos Sarym, Nıkıta Shatalov, Marat Báshimov, Parlament Májilisindegi «Aqjol» partııasynyń fraktsııa jetekshisi Azat Perýashev, Amanat partııasynyń fraktsııa jetekshisi Elnur Beısenbaev, Ulttyq quryltaı múshesi, saıasattanýshy Andreı Chebotarev sóz sóılep, óz oı-pikirlerin bildirdi.
Prezıdent Parlamenttik reforma jónindegi Jumys tobynyń birinshi otyrysynda bılik tarmaǵyn túbegeıli jańǵyrtý kerek ekenin aıtty.