Ádiletti Qazaqstandy qurý protsesin endi eshkim toqtata almaıdy – Qasym-Jomart Toqaev

ASTANA. KAZINFORM - Bul týraly Prezıdent Qasym-Jomart Toqaev QR Konstıtýtsııasynyń 30 jyldyǵyna arnalǵan konferentsııada sóılegen sózinde málim etti, dep habarlaıdy Aqordanyń baspasóz qyzmeti.

-Elimizdiń saıası júıesinde «Kúshti Prezıdent – yqpaldy Parlament – esep beretin Úkimet» qaǵıdaty ornyqty. Bul bılikte ózara tıimdi baılanys pen tepe-teńdikti saqtaýǵa múmkindik berdi. Prezıdenttiń jeti jylǵa bir ret qana saılanýy el tarıhyndaǵy asa mańyzdy saıası-quqyqtyq betburys dep aıtýǵa tolyq negiz bar. Sebebi mundaı jaǵdaı Qazaqstanda buryn-sońdy bolǵan emes. 

Osylaısha, elimizde bıliktiń biregeı úlgisi paıda boldy, ıaǵnı, memlekettik basqarý júıesi jańa qaǵıdaǵa saı jumys isteı bastady, sol arqyly memlekettegi saıası úderister áldeqaıda túsinikti, boljamdy, aıqyn bola tústi. Naqty aıtqanda, Prezıdenttiń jaqyn týystaryna bılik júıesinde laýazymdy qyzmet atqarýǵa tyıym salyndy. Bıliktegi otbasylyqqa tosqaýyl qoıyldy. Bul da óte qajetti qadam boldy.

-Halyqtyń osy sheshimi – asa mańyzdy saıası-quqyqtyq jańashyldyq, álemde balamasy joq konstıtýtsııalyq ınnovatsııa,-dedi Qasym-Jomart Toqaev.

Sondaı-aq Memleket basshysy 2019 jyldan beri biz kezeń-kezeńimen birneshe saıası reforma júrgizip, saıası júıeni dáıekti túrde jańǵyrtylǵanyna toqtaldy.

Osy zalda otyrǵan azamattardyń kóbi sol úlken ózgeristerdiń bel ortasynda júrdi. Ashyǵyn aıtqanda, biz birshama kedergige tap boldyq. Saıası ortanyń belgili bir bóligi qoǵamdy jańǵyrtýdy kózdeıtin bastamalarymyzǵa kúmánmen qarady, tipti qabyldaı almady. Búginde biz tańdaǵan strategııalyq baǵyttyń durys ekenine kózimiz jetti. Bul elimizdi órkenıetti qoǵam qurý jolyna bastaıdy. 

2022 jyly ótken referendým ultymyzdy buryn-sońdy bolmaǵan deńgeıde uıystyryp, memleket aldyndaǵy strategııalyq mindetterdiń tóńiregine toptastardy.
Azamattarymyzdyń jańa saıası baǵdardy biraýyzdan qoldaýy alǵa ilgerileýden basqa jol joq ekenin aıqyn kórsetti.

Tarıhı ólshem turǵysynan óte qysqa ýaqyt ishinde qoǵam saıası kemeldik pen azamattyq jaýapkershilikti kúsheıtetin irgeli ózgeristerdi bastan ótkerdi.

-Ádiletti Qazaqstandy qurý protsesin endi eshkim toqtata almaıdy. Ótkenge oralýǵa, eń aldymen, elimizdiń jastary jol bermeıdi. Bilimdi jas urpaq keleshekke kóz tigedi. Olar Qazaqstandy jańa zamannyń talabyna saı keletin órkenıetti memleket retinde kórgisi keledi,-dedi Prezıdent.

Osyǵan deıin Memleket basshysy Ata zańnan bıik eshteńe joq ekenin aıtqan bolatyn.